پەرەگراف
ڕێكارەكانی بانكی ناوەندی بۆ ڕاگرتنی دابەزینی بەهای دینار لە بەرانبەر دۆلاری ئەمریكی بێ كاریگەر بوون، بەهای دۆلار بە خێراییەكی زۆر لە بەرزبوونەوە بەردەوامە، بە جۆرێك كە ئەمڕۆ بەهای 100 دۆلار لە هەرێمی كوردستان گەیشتە سەروو 155 هەزار دینار.
بەیانیی ئەمڕۆ لە كاتی كردنەوەی بازاڕەكانی ئاڵوگۆڕی دراو لە هەرێمی كوردستان، بەهای 100 دۆلار 153 و 550 دینار بوو، بەڵام لە ماوەی چەند كاتژمێرێكدا بەهای 100 دۆلار گەیشتە سەروو 154 هەزار دینار.
پاشنیوەڕۆی ئەمڕۆیش بەهای دۆلار لە بەرزبوونەوە بەردەوام بوو تا 155 هەزار دیناری تێپەڕاند، بەڵام لە كاتژمێر 2:30 خولەكدا بەهای 100 دۆلار لە بازاڕی ئاڵوگۆڕی دراوی سلێمانی بۆ 154 هەزار و 500 دینار دابەزییەوە.
هۆكارێكی بەرزبوونەوەی دۆلار بەو خێراییە زۆرەی ئەمڕۆ، ئەوەیە كە بانكی ناوەندی بەهۆی پشووەكانەوە لە ڕۆژانی 23، 24 و 25ی ئەم مانگەدا هیچ بڕەدۆلارێكی نەفرۆشتووە.
سۆران عومەر، ئەندامی پەرلەمانی عێراق، لە هەژماری خۆی لە فەیسبووك دەڵێت "بۆ ڕۆژەكانی 26، 27، 28 و 29ی مانگیش، بانكی ناوەندیی عێراق بڕی 348 ملیۆن دۆلار دەفرۆشێت، كە 220 ملیۆن دۆلاری بۆ ناوخۆیە و 128 ملیۆن دۆلاری بۆ حەواڵە و دەرەوەی وڵاتە".
ئەو پەرلەمانتارە دەڵێت "ئەمە كەمترین خستنەبازاڕی دۆلارە لەلایەن بانكی ناوەندییەوە، بەراورد بە هەفتەكانی پێشووی ئەم مانگە".
هەرچەندە بانكی ناوەندی لە چەند هەفتەی ڕابردوودا گرتنەبەری چەند ڕێكارێكی جیاوازی بۆ دابەزاندنی بەهای دۆلار ڕاگەیاند، بەڵام بە پێچەوانەوە بەهای دۆلار هەر لە بەرزبوونەوەدایە.
پاش هەڵكشانی بەرچاوی نرخی دۆلار بە تایبەت لە 15ی ئەم مانگە كە بەهای 100 دۆلار 152 هەزار دیناری تێپەڕاند، بانكی ناوەندیی عێراق نرخی هەر دۆلارێكی بە بڕی پێنج دینار كەم كردەوە.
بانكی ناوەندیی عێراق نرخی هەر دۆلارێك كە بۆ سوود و مامەڵەی ئاڵوگۆڕی دراو بەكار دێت، لە 1470 دینارەوە بۆ 1465 دینار دابەزاند. هەروەها نرخی هەر دۆلارێكی بۆ مامەڵە و كاروباری دیكە لە 1460 دینارەوە بۆ 1455 دینار كەم كردەوە، كە بۆ هەر 100 دۆلارێك دەكاتە 500 دینار.
بانكەكە بەرزبوونەوەی نرخی دۆلار بۆ چەند هۆكارێك گەڕاندەوە و دەڵێت "یەكێك لەوانە دروستكردنی پێگەیەكی ئەلیكترۆنییە كە لە ڕێگەیەوە بانكەكان داواكاریی كڕینی دۆلار ئاراستەی بانكی ناوەندی دەكەن".
بانكی ناوەندیی عێراق وتیشی "چەند ڕێكارێكمان گرتووەتە بەر بۆ فراونكردنی خستنە بازاڕی دراوی بیانی، تاكوو پێداویستیی خەڵك بە دراوی بیانی پڕ بكرێتەوە".
سەبارەت بە دۆخی دراوی نەختینەیی دەوڵەتیش، بانكی ناوەندیی عێراق ڕایگەیاند "بەراورد بە چەند دەیەی ڕابردوو، بە شێوەیەكی گشتی لە باشترین بارودۆخدایە".