پەرەگراف
بەهای دۆلار لە بازاڕەكانی ئاڵوگۆڕی دراوی عێراق و هەرێم بە خێراییەكی زۆر لە بەرزبوونەوەدایە، بەهای 100 دۆلار لە هەرێمی كوردستان 157 هەزار دیناری تێپەڕاند. باس لە هۆكاری جیاواز بۆ دابەزینی بەهای دینار بەرانبەر دۆلار دەكرێت، بەڵام گەیشتنی بە ئاستی دراوی تمەنی ئێرانی و لیرەی لوبنانی ڕەت دەكرێتەوە.
بەیانیی ئەمڕۆ لە كاتی كردنەوەی بازاڕی ئاڵوگۆڕی دراو لە سلێمانی، بەهای 100 دۆلار 154 هەزار و 850 دینار بوو، بەڵام لە كاتژمێر 2:30 خولەكی پاشنیوەڕۆ گەیشتە 157 هەزار دینار و دواتر بۆ 157 هەزار و 500 دینار بەرز بووەوە، لە كاتژمێر 3:30 خولەكدا گەڕایەوە سەر 157 هەزار دینار.
هەرچەندە دەستكاریكردنی بەهای دراو لە دەسەڵاتی بانكی ناوەندیدایە و پەرلەمانی عێراق ناتوانێت ڕێكارێكی ئەوتۆ لەوبارەیەوە بگرێتە بەر، بەڵام 65 پەرلەمانتار یاداشتنامەیەكیان ئاراستەی سەرۆكایەتیی پەرلەمانی عێراق كردووە بۆ ئەنجامدانی دانیشتێكی تایبەت بە تاوتوێكردنی هۆكارەكانی دابەزینی بەهای دینار لە بەرانبەر دۆلار.
ئەحمەد سەفار، بڕیاردەری لیژنەی دارایی ئەنجوومەنی نوێنەرانی عێراق، بەرزبوونەوەی نرخی دۆلار بە "سزای سیاسیی ئەمریكا بۆ سەر عێراق" ناو دەبات و پێی وایە "كۆنترۆڵكردنی پێویستی بە ڕێككەوتنی سیاسیی ئەمریكا و عێراق هەیە".
بە لێكدانەوەی ئەحمەد سەفار، هەڵوێستە سیاسییەكانی عێراق لەوانە "بەشداریكردن لە لووتكەی عەرەبی-چینی كە لە سعودییە بەڕێوە چوو، بردنە دەرەوەی دۆلار بۆ وڵاتانی دراوسێ لە عێراقەوە"، هۆكاری سزاكانی ئەمریكایە بۆ سەر عێراق.
بڕیاردەری لیژنەی دارایی ئەنجوومەنی نوێنەرانی عێراق هۆشداری دەدات كە ئەگەر بەغداد بە زوویی لەگەڵ واشنتۆن ڕێك نەكەوێت، نرخی دۆلار زیاتریش بەر زدەبێتەوە و كێشەی ئابووری بۆ عێراق دروست دەكات.
لە لایەكی دیكەوە ڕاوێژكارێكی سوودانی پێی وایە "قۆرغكاری" هۆكاری بەرزبوونەوەی نائاسایی نرخی دۆلارە.
مەزهەر محەمەد ساڵح، ڕاوێژكاری دارایی سەرۆكوەزیرانی عێراق، جەخت دەكاتەوە كە بانكە تایبەتەكان پابەندن بە بنەما پێوانەییەكان و دراوی بیانیش لە عێراقدا لە بەرزترین ئاستیدایە كە نزیكە لە 100 ملیار دۆلاری ئەمریكی، بۆیە مژدەی "سەقامگیربوونی نرخی دینار" دەدات و دەڵێت "هیچ ترسێك لەئارادا نییە".
ئەندامێكی پێشووی لیژنەی دارایی پەرلەمانی عێراقیش لە نووسینێكدا لەژێر ناوی "سێ ڕاستیی خێرا سەبارەت بە بەرز و نزمیی نرخی دیناری عێراقی بەرامبەر دۆلاری ئەمریكی"، جەخت دەكاتەوە كە "ئەو ناجێگیریە كاتییە و جارێكی تر بە نرخی دیاریكراوی بانكی ناوەندیی عێراقی، بەهای دینار بەرامبەر دۆلاری ئەمریكی جێگر دەبێتەوە".
هۆشیار عەبدوڵڵا لە هەژماری خۆی لە تۆڕی كۆمەڵایەتیی فەیسبووك، نووسیویەتی "یەكێك لە گرنگترین هۆكارەكانی گۆڕینی بەهای دینار، بریتی بوو لە ڕێگرتن لە چوونە دەرەوەی دراو بە تایبەتی دۆلار، ئەمریكا جارێكی تر بە ئاسانی ڕێگا نادات ئەو دۆلارەی ئەیداتە عێراق لە بەرامبەر داهاتی نەوت، بە شێوەی گوماناوی بگاتە وڵاتانی دراوسێ".
ئەو ئەندامەی پێشووی لیژنەی دارایی پەرلەمانی عێراق باس لە بەهێزیی یەدەگی نەختینەیی عێراق دەكات كە نزیك بووەتەوە لە ۱٠٠ ملیار دۆلار، بۆیە دەڵێت "عێراق دەتوانێت هاوسەنگیی نێوان ئەو دوو دراوە كۆنترۆڵ بكات".