پەرەگراف
لە كۆبوونەوەی لەگەڵ برێت مەكگۆرك، مەسعود بازانی ڕایگەیاندووە "پێویستە ئەمساڵ لە هەرێمی كوردستان هەڵبژاردنێكی پاك و بێگەرد بەڕێوە بچێت و هیچ بیانوویەكیش بۆ دواخستنی هەڵبژاردن قبووڵ ناكرێت".
برێت مەكگۆرك، ڕێكخەری كۆشكی سپی بۆ كاروباری ئاسایشی ڕۆژهەڵاتی ناوەڕاست و باكووری ئەفریقا، پاش سەردانەكەی بۆ بەغداد و هەولێر و كۆبوونەوەی لەگەڵ محەمەد شیاع سوودانی و نێچیرڤان بازانی، ئەمڕۆ لە سەلاحەددین لەگەڵ مەسعود بارزانی، سەرۆكی پارتی كۆبووەوە.
بارەگای بارزانی دەڵێت "لە دیدارەكەدا بارودۆخی سیاسیی عێراق و پەیوەندییەكانی نێوان هەرێم و بەغدا تاوتوێ كرا، جەخت لە پێویستیی چارەسەركردنی گرفتەكانی نێوان هەرێم و بەغدا و بایەخی ڕۆڵی عێراق و هەرێمی كوردستان لە تێپەڕاندنی ئاستەنگەكانی بەردەم وزە لە ئاستی جیهانیدا كرایەوە".
بەپێی ڕاگەیەندراوی بارەگای بارزانی، بارودۆخی هەرێمی كوردستان تەوەرێكی تری كۆبوونەوەیەكە بووە و تێیدا مەسعود بارزانی دووپاتی كردووەتەوە كە "پێویستە ئەمساڵ لە هەرێمی كوردستان هەڵبژاردنێكی پاك و بێگەرد بەڕێوە بچێت و هیچ بیانوویەكیش بۆ دواخستنی هەڵبژاردن قبووڵ ناكرێت".
مەكگۆرك و بارزانی گفتوگۆیان دەربارەی كێشەكانی ناوخۆی هەرێمیش كردووە، لەوباریەوە بارزانی ڕایگەیاندووە كە خوازیاری ئەوەیە "لەپێناو تێپەڕاندنی تەحەددیاتەكان و پاڵپشتیكردنی حكوومەتی هەرێم، كۆبوونەوە و هەماهەنگیی نێوان لایەنە سیاسییەكان بەردەوام بێت".
سەبارەت بە چاكسازییەكان لەناو هێزی پێشمەرگەی كوردستانیش، مەسعود بارزانی "پشتیوانیی خۆی بۆ بەردەوامیی ئەو چاكسازییانە دووپات كردەوە".
"بارودۆخی سیاسیی ناوچەكە و هەڕەشەكانی تیرۆر، تەوەرێكی تری ئەو كۆبوونەوەیە بوون و شاندی میوان جەختی لە بایەخی ئاسایش و سەقامگیری لە عێراق و هەرێمی كوردستان كردەوە"، بارەگای بارزانی وا دەڵێت.