بافڵ تاڵەبانی و مەكگۆرك "دوایین گۆڕانكارییە سیاسی، ئابووری و ئەمنییەكان"یان تاوتوێ كردووە
پەرەگراف
لە كۆبوونەوەی نێوان بافڵ تاڵەبانی و برێت مەكگۆركدا "دوایین گۆڕانكارییە سیاسی، ئابووری و ئەمنییەكانی هەرێم و عێراق" تاوتوێ كراون.
بافڵ تاڵەبانی، سەرۆكی یەكێتی، لە بارەگای مەكتەبی سیاسیی حیزبەكەی لە هەولێر، پێشوازیی لە برێت مەكگۆرك، نێردەی سەرۆكی ئەمریكا بۆ كاروباری ڕۆژهەڵاتی ناوەڕاست و باكووری ئەفریقا و وەفدی یاوەری كردووە.
هەژماری فەرمیی بافڵ تاڵەبانی لە فەیسبووك دەڵێت "جەخت لە یەكخستنی هەوڵە نیشتمانییەكان كرایەوە لەپێناو زاڵبوون بەسەر كێشەكاندا".
هەروەها ئاماژەی بەوە كردووە "لە درێژەی دیدارەكەدا پەرەپێدانی پەیوەندییەكانی نێوان هەردوولا لەپێناو پاراستنی بەرژەوەندییە باڵاكان، گفتوگۆی لەبارەوە كراوە".
مەكگۆرك ئێوارەی ڕابردوو بە سەردانێك گەیشتە بەغداد و لەگەڵ محەمەد شیاع سوودانی، سەرۆكوەزیرانی عێراق كۆبووەوە، هەر شەوی ڕابردوو گەیشتە هەولێر و لەگەڵ نێچیرڤان بارزانی سەرۆكی هەرێم كۆبوونەوەی ئەنجام دا. بەیانیی ئەمڕۆیش لەگەڵ مەسعود بارزانی، سەرۆكی پارتی كۆبووەوە.
مەكگۆرك لە سەردانەكەیدا لەگەڵ بەرپرسانی عێراق و هەرێم گفتوگۆی دەربارەی پێشهاتە سیاسی و ئەمنی و ئابوورییەكان كردووە، بە تایبەت كێشەكانی نێوان هەرێم و بەغداد، كێشەكانی نێوان پارتی و یەكێتی، پرسی وزە و یەكگرتنەوەی هێزەكانی پێشمەرگە.
هەریەك لە ئامۆس هۆكستاین، نێردەی سەرۆكایەتیی ئەمەریكا بۆ ژێرخانی جیهانی و ئاسایشی وزە و خاتوو ئالینا ڕۆمانۆوسكی، باڵیۆزی ئەمەریكا لە عێراق و ژمارەیەك ڕاوێژكاری وەزارەتی دەرەوە، لەناو شاندەكەی ئەمریكادا بوون.
سەرۆكایەتیی هەرێم لەبارەی ناوەرۆكی كۆبوونەوەی نێچیرڤان بارزانی و مەكگۆرك دەڵێت "دوایین پێشهاتە سیاسییەكانی عێراق، پەیوەندییەكانی ئەمەریكا لەگەڵ عێراق و هەرێمی كوردستان، پەیوەندییەكانی هەولێر ـ بەغدا و گفتوگۆی چارەسەركردنی كێشەكانیان، دۆخی ناوخۆی هەرێمی كوردستان و پرۆسەی یەكخستنی پێشمەرگە"، تاوتوێ كراون.
بەپێی ڕاگەیەندراوی بارەگای بارزانییش، لە كۆبوونەوەی بارزانی و مەكگۆركدا "بارودۆخی سیاسیی عێراق و پەیوەندییەكانی نێوان هەرێم و بەغدا، بارودۆخی هەرێمی كوردستان، چاكسازییەكان لەناو هێزی پێشمەرگە، بارودۆخی سیاسیی ناوچەكە و هەڕەشەكانی تیرۆر" تاوتوێ كراون.
بارەگای بارزانی دەڵێت "لە دیدارەكەدا جەخت لە پێویستیی چارەسەركردنی گرفتەكانی نێوان هەرێم و بەغدا و بایەخی ڕۆڵی عێراق و هەرێمی كوردستان لە تێپەڕاندنی ئاستەنگەكانی بەردەم وزە لە ئاستی جیهانیدا كرایەوە".
مەسعود بارزانی دووپاتی كردووەتەوە كە "پێویستە ئەمساڵ لە هەرێمی كوردستان هەڵبژاردنێكی پاك و بێگەرد بەڕێوە بچێت و هیچ بیانوویەكیش بۆ دواخستنی هەڵبژاردن قبووڵ ناكرێت".
سەبارەت بە كێشە ناوخۆییەكانی هەرێمیش بارزانی ڕایگەیاندووە كە خوازیاری ئەوەیە "لەپێناو تێپەڕاندنی تەحەددیاتەكان و پاڵپشتیكردنی حكوومەتی هەرێم، كۆبوونەوە و هەماهەنگیی نێوان لایەنە سیاسییەكان بەردەوام بێت".