دادگای فیدراڵی لەسەر سێ سكاڵای پەیوەست بە هەرێم كۆدەبێتەوە؛ یەكێكیان دژی ٤٠٠ ملیارەكەیە
پەرەگراف
دادگای باڵای فیدراڵیی عێراق لە یەك هەفتەدا لەسەر سێ سكاڵای پەیوەست بە هەرێمی كوردستان كۆدەبێتەوە، یەكێك لە سكاڵاكان دژی ناردنی ٤٠٠ ملیار دینارەكەیە كە هێشتا نەگەیشتووەتە هەرێمی كوردستان.
بەپێی خشتەی كۆبوونەوەكانی دادگای باڵای فیدراڵی، لە ماوەی ٢٥ تا ٣١ی ئەم مانگە، دادگاكە لەسەر سێ سكاڵا لە دژی هەرێمی كوردستان كۆدەبێتەوە، سكاڵای یەكەم لەلایەن پەرلەمانتارێكی سەربەخۆ و پارێزگاری واست لە دژی ناردنی پارە لە بەغداوە بۆ هەرێم تۆمار كراوە و سبەینێ 25-1-2023 وادەی دادبینییەتی.
هاوكات ٣٠ی ئەم مانگە دادگاكە لەسەر سكاڵایەكی دیكە كۆدەبێتەوە كە تێیدا داوا لە وەزارەتی بازرگانیی هەرێم كراوە ئەو پارانە بگەڕێنێتەوە كە لە ئەستۆیاندایە و تایبەتە بە بەشەخۆراكی مانگانەی هاوڵاتییانی هەرێم لە ٢٠٠٤ تا ٢٠٢١.
سكاڵای دووەم كە تا ئێستا دانیشتن لەبارەیەوە سێ جار دواخراوە، لەلایەن بەڕێوەبەری كۆمپانیای گشتیی بازرگانیی خۆراكی حكومەتی عێراق لەسەر وەزیری بازرگانی و پیشەسازیی هەرێمی كوردستان و بەڕێوەبەری گشتیی بازرگانی تۆمار كراوە.
سكاڵای سێیەمیش كۆتا ڕۆژی ئەم مانگە وادەی دادبینییەتی و لەبارەی پرسی درێژكردنەوەی تەمەنی پەرلەمانی كوردستان و تۆماركردنی سكاڵایە لەسەر نادەستووریبوونی ئەو درێژكردنەوەیە.
سكاڵای سێیەم لەلایەن چوار كەسەوە چوار سكاڵای جیاوازی لەبارەوە تۆمار كراوە، كە بریتین لە یوسف محەممەد، سەرۆكی پێشووی پەرلەمانی كوردستان، شاسوار عەبدولواحید، سەرۆكی جووڵانەوەی نەوەی نوێ و سروە عەبدولواحید، سەرۆكی فراكسیۆنی نەوەی نوێ لە پەرلەمانی عێراق و كاوە عەبدولقادر، سەرۆكی فراكسیۆنی نەوەی نوێ لە پەرلەمانی كوردستان.