ئەمریكا خەڵاتی بەرگریكردن لە مافەكانی مرۆڤ دەبەخشێتە پارێزەرێكی دۆسیەی دەستگیركراوانی بادینان

30-01-2023 10:34

پەرەگراف

خەڵاتی بەرگریكردن لە مافەكانی مرۆڤ لەلایەن وەزارەتی دەرەوەی ئەمریكاوە بە بەشدار حەسەن، ‏پارێزەری دۆسیەی دەستگیركراوانی بادینان دەبەخشرێت. خۆی دەڵێت "لەناو 600 كەسدا كە سیڤییان ‏پێشكەش كراوە، من و كەسێكی دیكە بۆ وەرگرتنی خەڵاتەكە هەڵبژێردراوین".‏

بەشدار حەسەن ئەمشەو بە فڕۆكە بەرەو واشنتۆن بەڕێ‌ كەوت، تا دووسبەی خەڵاتەكە وەربگرێت. بەر ‏لە ڕۆیشتنی لە فڕۆكەخانە لەبارەی خەڵاتەكەوە بۆ پەرەگراف دوا.‏

بەشدار حەسەن، پارێزەری دۆسیەی دەستگیركراوانی بادینان، بە پەرەگرافی وت "لەلایەن هەموو ‏باڵیۆزخانە و نێردە دیبلۆماتییەكانی ئەمریكا لە وڵاتانی جیهاندا، سیڤیی ئەو كەسانە بۆ وەزارەتی ‏دەرەوە ڕەوانە كراوە كە بەرگری لە مافی مرۆڤ دەكەن".‏

ئەو پارێزەرە وتیشی "لەناو زیاتر لە ٦٠٠ سیڤیدا (كە لەلایەن باڵیۆزخانە و نێردە دیبلۆماتییەكانی ‏ئەمریكا لە وڵاتانی جیهاندا ڕەوانەی وەزارەتی دەرەوە كراون)، دوو كەس بۆ وەرگرتنی خەڵاتەكە ‏هەڵبژێردراون كە یەكێكیان منم".‏

وەزارەتی دەرەوەی ئەمریكا ساڵانە لە مانگی دوودا، دوو كەسایەتی خەڵات دەكات وەكوو باشترین ‏بەرگریكارەكان لە مافی مرۆڤ لەسەر ئاستی جیهان‎.‎

بەشدار حەسەن بۆ پەرەگراف وتی "كاتژمێر ١٠ی بەیانیی ڕۆژی ١-٢-٢٠٢٣، لە مەراسیمێكدا لە ‏باڵەخانەی وەزارەتی دەرەوەی ئەمریكا لە واشنتۆن، خەڵاتەكە لەلایەن وەزیری دەرەوە یان جێگرەكەی ‏پێشكەش دەكرێت".‏

بەشدار حەسەن كە یەكێكە لە پارێزەرە خۆبەخشەكانی ڕۆژنامەنووس و چالاكانی دەستگیركراوی ‏بادینان، لە دوو ساڵی ڕابردوودا ڕۆڵێكی گرنگ و بەرچاوی هەبوو لە پارێزگاریكردن لە مافی ئەو ‏دەستگیركراوانە.‏