پەرەگراف
بومەلەرزەیەكی بەهێز باكووری كوردستان و توركیا و ڕۆژئاوای كوردستان و سووریای هەژاند، بەپێی دوایین ئامارەكان لە توركیا 284 كەس و لە سووریا 245 كەس گیانیان لەدەست داوە. بومەلەرزەكە لە هەرێمی كوردستانیش هەستی پێ كراوە و زیانێكی كەمی ماددی هەبووە.
وەزارەتی تەندروستیی سووریا دەڵێت "بەهۆی بومەلەرزەكەوە 245 كەس گیانیان لەدەست داوە و 639 كەس بریندار بوون". تەنیا لە شاری عەفرینی ڕۆژئاوای كوردستان نزیكەی 50 كەس ڕۆژئاوای كوردستان گیانیان لەدەست داوە.
لە توركیا و باكووری كوردستان دوو هەزار و 323 كەس بریندار بوون و زیاتر لە هەزار و 700 باڵەخانە و یەكەی نیشتەجێبوون داڕماون.
چەقی بومەلەرزەكە شاری مەڕەش لە باكووری كوردستان بووە. توركیا دەڵێت "گوڕی بومەلەرزەكە 7.4 پلەی ڕێكختەر بووە"، بەڵام ئەمریكا دەڵێت "گوڕەكەی 7.8 پلەی ڕێختەر بووە".
بومەلەرزەكە زیانی گەورەی بە 10 پارێزگای باكووری كوردستان و توركیا گەیاندووە، بە تایبەتیش پێنج پارێزگای ئامەد، ئەدەنە، غازی عەنتاب، عوسمانییە و ماڵاتیا زیانی گیانی و ماددیی گەورەیان پێ گەیشتووە. سەدان كەس بەهۆی بومەلەرزەكەوە بریندار بوون و دەیان باڵەخانە و خانوو ڕووخاون.
لە سووریا و ڕۆژئاوای كوردستانیش بە تایبەت لە پارێزگاكانی حەلەب، ئیدلب، لازقییە و حەما زیانی گیانی و ماددیی گەورە كەوتووەتەوە. هەروەها لە عێراق، سووریا، یۆنان، فەڵەستین، لوبنان و میسر هەستی پێ كراوە.
توركیا بەهۆی بومەلەرزەكەوە باری لەناكاوی بۆ پلەی چوار بەرزكردەوە كە داواكردنی هاوكاریی نێودەوڵەتی لەخۆ دەگرێت.
پاش بومەلەرزەی یەكەم، 22 پاشلەرزەی دیكە لە ناوچەكە ڕوویان داوە كە بەشێكیان گەیشتوونەتە شەش پلەیڕێختەر.