پەرەگراف
ئاماری قوربانیانی بومەلەرزە لە توركیا و سووریا لە هەڵكشانی بەردەوامدایە، تا ئێستا زیاتر لە هەزار و 600 كەس لە توركیا و زیاتر لە هەزار كەس لە سووریا گیانیان لەدەست داوە. زۆرترین قوربانی و زیان لە باكوور و ڕۆژئاوای كوردستان كەوتووەتەوە.
لە دەیان وڵاتەوە تیمی فریاگوزاری ڕەوانەی ناوچە كارەساتبارەكان بە تایبەت لە باكووری كوردستان كراون، لەناویشیاندا تیمی هەرێمی كوردستان و عێراق هەن.
ڕێبەر ئەحمەد، وەزیری ناوخۆیی حكومەتی هەرێمی كوردستان، لە كۆنگرەیەكی ڕۆژنامەوانیدا وتی "لەلایەن توركیاوە داوا لە هەرێمی كوردستان كراوە تیمی تەندروستی و جەی سی سی بۆ هاوكاریكردنی لێقەوماوان و ڕزگاركردنی ئەو كەسانەی كە لەژێر داروپەردوو ماونەتەوە، ڕەوانەی ئەو وڵاتە بكەین".
بەپێی ئاماری فەرمیی توركیا، تا ئێستا لەو وڵاتە هەزار و 651 كەس گیانیان لەدەست داوە، 11 هەزار و 119 كەس بریندار بوون، سێ هەزار و 471 خانوو و باڵەخانەیش داڕووخاون.
ڕەجەب تەیب ئەردۆغان، سەرۆككۆماری توركیا، بەهۆی بوومەلەرزەكانەوە لە وڵاتەكەی، بۆ ماوەی حەوت ڕۆژ ماتەمینیی سەرانسەریی لە وڵاتەكەی ڕاگەیاند.
لە سووریاش ئاماری جیاواز سەبارەت بە زیانە گیانی و ماددیەكان بڵاو دەكرێنەوە و ئاماری فەرمیی ورد نییە، بەڵام ڕووانگەی سووری بۆ مافەكانی مرۆڤ دەڵێت "زیاتر لە 900 كەس گیانیان لەدەست داوە و سەدان كەس بێسەروشوێنن".
كەناڵی جەزیرەش كە بەردەوام لە سەرچاوەی جیاوازەوە زانیارییەكان لە سووریاوە دەگوازێتەوە، بڵاوی كردەوە كە "ژمارەی گیانلەدەستدان لە سووریا بۆ هەزار و 38 كەس بەرز بووەتەوە".
ڕووانگەی سووری بۆ مافەكانی مرۆڤ دەشڵێت "لە 58 شار و شارۆچكە و گوند، هەزاران خانوو و باڵەخانە داڕووخاون، بەڵام تا ئێستا حكومەتی سووریا داوای هاوكاریی نێودەوڵەتیی نەكردووە".
لە دوای زەمینلەرزەكەی بەرەبەیانی ئەمڕۆ كە سەرۆككۆماری توركیا وتی "گوڕەكەی 7.7 پلەی ڕێختەر بووە"، پاشنیوەڕۆی ئەمڕۆیش بومەلەرزەیەكی دیكە بە گوڕی 7.6 پلە باكووری كوردستانی هەژاندەوە.
بە درێژایی ئەمڕۆ 145 پاشلەرزە لە باكووری كوردستان و توركیا تۆمار كراون كە بەشێك لە پاشلەرزەكان گوڕەكانیان گەیشتوونەتە شەش پلەی ڕێختەر.
وەزارەتی تەندروستیی هەرێم دەڵێت "لەسەر ڕاسپاردەی سەرۆكی حكومەتی هەرێمی كوردستان، تیمەكانی فریاگوزاری و پزیشكی فریاكەوتن و ژمارەیەكی زۆر لە پزیشكانی پسپۆڕ و كارمەندانی تەندروستی و ئەمبوڵانس و بڕێكی زۆری پێداویستیی پزیشكی، بۆ وڵاتانی توركیا و سووریا بەڕێ كەوتن، بەمەبەستی بەهاناوەچوون و پشتیوانیی قوربانیانی بوومەلەرزە".
هەڵمەتی ڕزگاركردن لەلایەن نۆ هەزار كارمەندی توركیا و تیمی هاوكاریی چەندین وڵاتی دیكەوە بەردەوامن لە ڕزگاركردنی ئەو كەسانەی كە كەوتوونەتە ژێر داروپەردووی خانوو و باڵەخانە ڕووخاوەكان، بەردەوام ئاماری قوربانییانیش لە بەرزبوونەوەدایە.