پەرەگراف
لە كاتێكدا نیوەی وەرزی خوێندنی ئەمساڵ تەواو بووە، حكومەتی هەرێم ڕایگەیاند بۆ وەرزی خوێندنی 2022 بۆ 2023 پاڵپشتیی دارایی لە شێوەی دەرماڵەدا بە خوێندكارانی زانكۆ و پەیمانگا دەدات.
فەرمانگەی میدیا و زانیاریی حكومەتی هەرێم ڕایگەیاند "مەسرور بارزانی، سەرۆكی حكومەتی ھەرێمی كوردستان، ڕەزامەندیی دا لەسەر بەردەوامی و خەرجكردنی زیاتر لە حەوت ملیار و 250 ملیۆن دیناری مانگانە وەك پاڵپشتی بۆ قوتابییان و خوێندكارانی زانكۆ و پەیمانگاكانی ھەرێمی كوردستان و دابینكردنی خزمەتگوزاری بەشە ناوخۆییەكان".
فەرمانگەكە دەڵێت "ئەم گوژمەیە ھاوشێوەی ساڵی خوێندنی (2021-2022) لەسەر بوودجەی زانكۆ و پەیمانگاكان تەرخان دەكرێت".
بڕیاری خەرجكردنی ئەو پارەیە لە كاتێكدایە كە نیوەی وەرزی خوێندنی ئەمساڵ تەواو بووە و تا ئێستا ئەو بڕە هاوكارییە داراییە بە خوێندكارانی زانكۆ و پەیمانگاكان نەدراوە.
پاش بایكۆت و خۆپیشاندانەكانی ساڵی ڕابردووی خوێندكارانی زانكۆ و پەیمانگاكانی هەرێم بۆ پێدای دەرماڵە، حكومەتی هەرێم ئامادە نەبوو دەرماڵەی هەمیشەیی دەست پێ بكاتەوە، بەڵام بڕێك پارەی بۆ وەرزی خوێندنی 2021 – 2022 بۆ زانكۆ و پەیمانگاكان خەرج كرد، كە بەشێكی لە شێوەی دەرماڵەدا درا بە خوێندكاران و بەشێكیشی بۆ خەرجیی پێداویستیی بەشە ناوخۆییەكان بوو.