پەرەگراف
دەزگای هەواڵگریی توركیا بانگەشەی "دەستگیركردنی ئەندامێكی پەكەكە لە سلێمانی و گەڕاندنەوەی بۆ توركیا" دەكات، پەكەكەش ڕەتی دەكاتەوە و دەڵێت ئەو كەسە "ڕیزەكانی ئێمەی جێهێشتووە و خۆی ڕادەستی دەوڵەتی تورك كردووە".
ئەمڕۆ ئاژانسی ئەنادۆڵی توركی بڵاوی كردەوە كە دەزگای هەواڵگریی نیشتمانیی توركیا (MİT) لە ئۆپەراسیۆنێكیدا لە شاری سلێمانی، ڕەمەزان گونەش، ئەندامی هێزەكانی پاراستنی گەل (هەپەگە)ی دەستگیر كردووە.
ئاژانسەكە زانیاریی وردی لەسەر ئۆپەراسیۆنەكە و كاتی دەستگیركردنی ئەو كەسە بڵاو نەكردووەتەوە، بەڵام دەڵێت "دوای ئەوەی بۆ ماوەی نزیكەی ساڵێك چاودێری كرا، لە ئۆپەراسیۆنێكی میتدا دەستگیر كرا و برایەوە بۆ توركیا".
ناوەندی ڕاگەیاندنی و چاپەمەنیی هێزەكانی پاراستنی گەل (هەپەگە)، لە ڕاگەیەندراوێكدا هەواڵەكەی بە "دوور لە ڕاستی" ناو برد و دەبارەی ڕەمەزان گونەش دەڵێت "سێ ساڵ پێش ئێستا ڕیزەكانی ئێمەی جێهێشتووە، پاشان هاوسەرگیریی كرد و لە باشووری كوردستان نیشتەجێ بووە و هیچ پەیوەندییەكی بە بزووتنەوەكەمانەوە نەماوە".
وەكوو هەپەگە باسی دەكات "گونەش دوو مانگ لەمەوبەر لە شاری دهۆك لە باشووری كوردستان، خۆی ڕادەستی دەوڵەتی تورك كردووە".
ئەنادۆڵ بەپێی ئەو زانیارییانەی كە لە هێزە ئەمنییەكانی توركیاوە وەریگرتووە، دەڵێت "ڕەمەزان گونەش كە ناوە نهێییەكەی (شۆڕش/شۆڕشگێڕ)ـە، ساڵی ٢٠٠٨ پەیوەندیی بە پەكەكە/كەجەكە كردووە و ئەندامی هێزی تایبەتە".
"گونەش بەرپرسە لە ١٢ كردە لە نێوان ساڵانی ٢٠١١-٢٠١٧دا لە قەزای چوكورجای هەكاری، كە بەهۆیەوە ٥٧ سەرباز و پۆلیسێك و دوو گوند پارێز گیانیان لەدەست دا"، ئاژانسە توركییەكە وا دەڵێت.
ناوەندی ڕاگەیاندنی و چاپەمەنی هێزەكانی پاراستنی گەل لە كۆتایی ڕاگەیەندراوەكەدا دەڵێت "میتی تورك بە سیناریۆیەكی درۆ و ساختە، هەوڵ دەدات پرۆسەكە وەك سەركەوتنی خۆی نیشان بدات، با گەلی نیشتمانپەروەرمان و ڕای گشتی توركیا گوێ بە هەواڵە ناڕاستەكانی میت و میدیای شەڕی تایبەتی تورك نەدەن".