پارتی و یەكێتی دەربارەی یاسای هەڵبژاردن لەسەر چەند خاڵێك ڕێككەوتن؛ كورسیی كۆتاكان خاڵی سەرەكیی ناكۆكییە
پەرەگراف
دەزگاكانی هەڵبژاردنی پارتی و یەكێتی لەسەر ژمارەیەك خاڵ بۆ هەمواركردنەوەی یاسای هەڵبژاردن گەیشتنە ڕێككەوتنی سەرەتایی و كورسیی كۆتاكان خاڵی سەرەكیی ناكۆكیی نێوانیانە. بۆ "پرس و ڕاوێژ"یش بە هاوبەشی سەردانی لایەنەكانی دیكە دەكەن.
هەردوو لا ڕێككەوتوون كە "هەرێمی كوردستان بكرێت بە چوار بازنەی هەڵبژاردن، هەڵبژاردن نیوە بە لیستی كراوە و نیوە بە لیستی داخراو بێت، ژمارەی كورسیی بازنەكان لەسەر بنەمای ئاماری وەزارەتی بازرگانیی عێراق بێت، هەماهەنگی لەگەڵ كۆمیسیۆنی عێراق بۆ سوودوەرگرتن لە لیستی دەنگدەرانی عێراق بكرێت".
پاش كۆبوونەوەی دەزگای هەڵبژاردنی پارتی و یەكێتی لە هەولێر، سەرۆكی فراكسیۆنی پارتی و جێگری سەرۆكی فراكسیۆنی یەكێتی لە پەرلەمانی كوردستان، كۆنگرەیەكی ڕۆژنامەوانییان ئەنجام دا.
لوقمان وەردی، جێگری سەرۆكی فراكسیۆنی یەكێتی، ڕایگەیاند "لەسەر زۆربەی خاڵەكان لێكتێگەیشتنی هاوبەش هەبوو، بەڵام لەبەر ئەوەی ئەم پرسە نیشتمانییە و پەیوەندیدارە بە هێزە سیاسییەكانی تر و خەڵكی كوردستان، بڕیار درا لەگەڵ هێزە سیاسییەكانی تریش ڕاوێژ بكرێت، بۆ ئەوەی هەموو لایەكمان بگەین بە ڕێككەوتنی كۆتایی".
"ڕێككەوتنمان كردووە لەسەر ئەوەی كە كوردستان دەكرێت بە چوار بازنەی هەڵبژاردن، داتای حكومەتی فیدراڵی بۆ دابەشكردنی كورسییەكان بەكار دەهێنرێت، بەڵام تێڕوانینی جیاواز هەیە لەسەر شێوازی دابەشكردنی كورسیی كۆتاكان بەسەر بازنەكانی هەڵبژاردندا"، جێگری سەرۆكی فراكسیۆنی یەكێتی وای وت.
هەرچەندە لوقمان وەردی جەختی كردەوە كە "لەسەر كاراكردنەوەی كۆمیسیۆن، شێوازی هەڵبژاردنی لیست و لەسەر كۆی پرسەكان و زۆرینەی هەرەزۆری خاڵەكان ڕێككەوتین"، بەڵاو وتیشی "چەند خاڵێكی كەم ماوە".
هەروەها زانا مەلا خالید، سەرۆكی فراكسیۆنی پارتی، وتی "كۆبووینەوە بۆ ئەوەی هەنگاوەكانی هەمواركردنەوەی یاسای هەڵبژاردنی پەرلەمانی كوردستان دەست پێ بكەین، ئەو خاڵە ناكۆكانەی لە نێوان پارتی و یەكێتیدا هەن و لە گفتوگۆی دوو ساڵی ڕابردووی نێوان فراكسیۆنەكان نەگەیشتووین بە ئەنجام، بتوانین لە كۆبوونەوەی هەردوو دەزگای هەڵبژارداندا ڕێككەوتنی لەسەر بكرێت".
سەرۆكی فراكسیۆنی پارتی وتیشی "بۆ ڕەچاوكردنی ڕا و سەرنجی لایەنە سیاسییەكانی دیكە، بڕیارمان دا دەزگای هەڵبژاردنی پارتی و یەكێتی پێكەوە لەگەڵ لایەنە سیاسییەكان كۆببینەوە".
جێگری سەرۆكی فراكسیۆنی یەكێتیش دەڵێت "لەبەر ئەوەی ئەم پرسە نیشتمانییە و پەیوەندیدارە بە هێزە سیاسییەكانی تر و خەڵكی كوردستان، بڕیار درا لەگەڵ هێزە سیاسییەكانی تریش ڕاوێژ بكرێت، بۆ ئەوەی هەموو لایەكمان بگەین بە ڕێككەوتنی كۆتایی".
بڕیارە شاندی هاوبەشی دەزگای هەڵبژاردنی پارتی و یەكێتی ڕۆژی شەممەی داهاتوو كۆبوونەوەی دووەمیان ئەنجام بدەن. زانا مەلا خالید دەڵێت "جیاوازیی ئێمە و یەكێتی ماوەتەوە بۆ كۆبوونەوەی داهاتوو و وەرگرتنی ڕاو و سەرنجی پێكهاتەكان و لایەنە سیاسییەكانی دیكە".