دەربەندیخانییەكان لە مانگرتن و خۆپیشاندان بەردەوامن؛ متمانەیان بە بەڵێنی بەرپرسان نییە
پەرەگراف
مانگرتنی سەرتاسەری و خۆپیشاندانی فراوان لە قەزای دەربەندیخان بەڕێوە چوو. سەرەڕای بەڵێنی نووسینگەی قوباد تاڵەبانی بۆ چارەسەری كێشەكان، بەڵام چالاكان و هاووڵاتیانی قەزاكە دەڵێن متمانەیان بە بەڵێنەكان نییە و لە ناڕەزایەتی بەردەوام دەبن.
پاش یەك مانگ لە مانگرتن و چالاكی و گردبوونەوەی بەردەوام، ئەمڕۆ مانگرتنی سەرتاسەری لە دەربەندیخان ڕاگەیەندرا و بازاڕ و دووكانەكان نەكرانەوە. هاوكات سەدان كەس بەشدارییان لە خۆپیشاندانی فراوانی قەزاكەدا كرد كە لە مەیدانی ئازادیی دەربەندیخان بەڕێوە چوو هەر و بەردەوامە.
داواكاریی هاووڵاتیانی دەربەندیخان "دابینكردنی ئاوی پاكژ بۆ خواردنەوە، زیادكردنی كارەبای نیشتمانی، چارەسەركردنی كێشەكانی كەرتی تەندروستی و ڕێگاوبان"ـە.
سڵێمان محەمەد سەعید، قایمقامی دەربەندیخان، بەشداریی لە خۆپیشاندانەكەدا كرد و ڕایگەیاند، ئەمڕۆ لە نووسنگەی جێگری سەرۆكی حكومەتەوە پێی ڕاگەیەندراوە كە "١٠ ملیۆن دۆلار بۆ چارەسەركردنی كێشەی ناپاكژیی ئاوی دەربەندیخان تەرخان كراوە و گرفتی پارەی نەختینە لە بانكەكان بۆ جێبەجێكردنی ئەو بڕیارە نییە".
قائیمقامی دەربەندیخان وتیشی، لەمڕۆوە دەست بە كاركردن لە هۆڵی نەشتەرگەریی تەندروستیی دەربەندیخاندا كراوەتەوە كە بەهۆی بوومەلەرزەكەی ساڵی 2017ـەوە بیناكەی كێشەی بۆ دروست بوو بوو.
ناوبراو وتیشی، نووسنگەی قوباد تاڵەبانی داوای كردووە كە نوێنەری خۆپیشاندەران و چالاكان سەردانی بكەن بۆ ئەوەی گرەنتیی جێبەجێكردنی داواكارییەكانیان پێ بدات.
بەڵام بەشێك لە خۆپیشاندەران و چالاكان دەڵێن "متمانەمان بە بەڵێنەكانی حكومەت نییە، چونكە پێشتریش بەڵێن دراوە و جێبەجێ نەكراوە".
ئەوان جەخت دەكەنەوە تا جێبەجێكردنی داواكارییەكانیان لە خۆپیشاندان و ناڕٍەزایەتی بەردەوام دەبن.