پارێزگاری دهۆك داوا دەكات ئاكرێ‌ بكرێت بە پایتەختی نەورۆز

28-03-2023 03:47

پەرەگراف

پارێزگاری دهۆك بە نووسراوێكی فەرمی داوای لە ئەنجوومەنی وەزیرانی هەرێم ‏كرد كە ئاكرێ‌ بكاتە پایتەختی نەورۆز.‏

ڕاگەیاندی پارێزگای دهۆك دەڵێت "ئەمڕۆ سێشەممە 28-3-2023، عەلی ‏تەتەر، پارێزگاری دهۆك، داوای لە ئەنجوومەنی وەزیرانی هەرێمی كوردستان ‏كرد كە ئاكرێ‌ بە پایتەختی نەورۆز دیاری بكات".‏

پارێزگاری دهۆك ئاماژەی بەوە كردووە،‎ ‎داواكارییەكەی لەوەوە سەرچاوەی ‏گرتووە كە نەورۆزی ئاكرێ‌ جیاوازە و بووەتە پرس و بابەتی هەموو خەڵكی ‏ئاكرێ‌، داواكارییەكەش هی خەڵكی ناوچەكەیە.‏

پێشوازیكردن لە نەورۆز لە قەزای ئاكرێ‌ جیاوازە لە هەموو ناوچەكانی دیكە، ‏ساڵانە لە ڕۆژی نەورۆزدا ژمارەیەكی زۆر لە هاووڵاتیان بەجلوبەرگی كوردی و ‏مەشخەڵی ئاگرەوە ڕیز دەبەستن و دەچنی سەر چیای ناوچەكە بۆ كردنەوەی ‏ئاگری نەورۆز.‏

زۆرێك لە خەڵكی ئاكرێ‌ بەشداریی ئەو مەراسیمە جیاوازە دەكەن و ژمارەیەكی ‏زۆریش لە گەشتیار نەورۆزان ڕوو لە ناوچەكە دەكەن.‏

بڵند ڕەزا زێباری، سەرۆكی شارەوانیی ئاكرێ، هەفتەی ڕابردوو ڕایگەیاند ‏‏"زیاتر لە 100 هەزار كەس" بەشداریی مەراسیمی هەڵكردنی ئاگری ئەمساڵی ‏نەورۆزیان لە ئاكرێ كردووە و "نزیكەی 500 میوانی بیانی" بۆ بەشداریكردن ‏لە مەراسیمەكە سەردانی ئەو شارەیان كردووە.‏

قەزای ئاكرێ دەكەوێتە باشووری ڕۆژھەڵاتی پارێزگای دهۆك و لەنێوان سێ ‏چیادایە. خانووەكانی لەسەر یەك لە دامێنی چیاوە بەرەو سرەوە دروست ‏كراون، ئەوەش دیمەنێكی جوانی پێ‌ بەخشیوە.‏