دادگای باڵای فیدڕاڵی وادەی بڕیاردانی دیاریکرد لەبارەی سکاڵاکان لە دژی درێژکردنەوەی تەمەنی پەرلەمانی کوردستان
پەرەگراف
دادگای باڵای فیدڕاڵی عێراق کۆتایی بە دادبینی ھێنا لەسەر ئەو سکاڵایانەی لە دژی درێژکردنەوەی تەمەنی پەرلەمانی کوردستان تۆمارکراون.
دادگاکە لە دانیشتنی ئەمڕۆیدا کە شەشەم دانیشتن بوو، ڕۆژی ٣-٥-٢٠٢٣ی دیاریکرد بۆ دەرکردنی بڕیار لەسەر سکاڵاکان.
"لە ھەر شەش دانیشتنی دادبینیی دادگاکە سەبارەت بەم دۆسییەیە، جگە لە جەخت کردنەوە لەسەر نادەستوری و نادیموکراتی بونی ھەرجۆرە درێژکردنەوەیەک بۆ دامەزراوە و کەسە ھەڵبژێردراوەکان، ھەوڵمان داوە گرنگیی ئەنجامدانی ھەڵبژاردن بەدور لە گزیکاری و تەزویر ودور لە دەستێوەردانی ھێزی چەکدار و ئەمنی بسەلمێنین" یوسف محەمەد سەرۆکی پێشووتری پەرلەمانی کوردستان کە یەکێکە لە سکاڵاكارەکان وادەڵێت.
سەرۆکی پێشووتری پەرلەمانی کوردستان دەشڵێت "ئەنجامدانی ھەڵبژاردن بێ دەستەبەرکردنی نەزاھەت و پاکی و دروستیی دەرەنجامەکانی و قەبوڵ کردنی لە لایەن ھەموانەوە، ھیچ لە دۆخی چەقبەستوی ھەرێم ناگۆڕێت".
لە بەرانبەر درێژكردنەوەی تەمەنی پەرلەمان، سكاڵا لەسەر سەرۆكایەتیی پەرلەمانی كوردستان لەلایەن یوسف محەمەد و سروە عەبدولواحید، سەرۆكی فراكسیۆنی نەوەی نوێ لە پەرلەمانی عێراق و شاسوار عەبدولواحید، سەرۆكی جووڵانەوەی نەوەی نوێ و كاوە عەبدولقادر، سەرۆكی فراكسیۆنی نەوەی نوێ لە پەرلەمانی كوردستان، تۆمار كراوە.
سكاڵاكارەكان دەڵێن، درێژكردنەوەی تەمەنی پەرلەمانی كوردستان لەلایەن پەرلەمان خۆیەوە، نایاساییە و پێچەوانەی دەستووریشە. داوای هەڵوەشاندنەوەی یاسای ژمارە ١٢ی ساڵی ٢٠٢٢ی تایبەت بە درێژكردنەوەی خولی پێنجەمی پەرلەمانی كوردستان دەكەن، كە لە ڕۆژی٩-١٠-٢٠٢٢ لەلایەن پەرلەمانی كوردستانەوە پەسەند كرا.
دادگای باڵای فیدراڵیی عێراق هەر چوار سكاڵاكەی كردووە بە یەك و ڕۆژی ١٨-١٢-٢٠٢٢ یەكەم دانیشتنی لەوبارەیەوە ئەنجام دا.