پەرەگراف
شاندی هەرێمی كوردستان بۆ سێیەم جار لە ماوەی ١٠ ڕۆژدا سەردانی بەغدادی كردەوە بە ئامانجی ڕێككەوتن لەسەر دەستپێكردنەوەی هەناردەی نەوت. گفتوگۆكان لە نێوان هەولێر و بەغداد لەلایەك و پێكەوەش لەگەڵ كۆمپانیاكانی كڕیاری نەوت بەڕێوە دەچن.
بە وتەی وەزارەتی نەوتی عێراق، هەردوولا نزیكن لە ڕێككەوتنی كۆتایی و بە ڕاگەیەندراوێكی هاوبەش ڕێككەوتنەكە بڵاو دەكەنەوە.
بەپێی وردەكاریی گفتوگۆكانی نێوانیان، كە پەرەگراف لە سەرچاوەیەكی ئاگادارەوە دەستی كەوتووە، "بڕیارە هەرێمی كوردستان بەردەوام بێت لەسەر هەناردەی نەوتی هەرێم و كەركووك بۆ بەندەری جەیهانی توركیا و پارەی فرۆشتنی نەوتەكە بخرێتە هەژماریكی بانكی و لە دەسەڵاتی حكومەتی هەرێمدا بێت مامەڵەی پێوە بكات، بەڵام بە چاودێریی بەغداد".
"حكومەتی عێراق سوورە لەسەر دۆزینەوەی میكانیزمێك تا نەوتی هەرێم بە نرخی كۆمپانیای سۆمۆی عێراق بفرۆشرێت لەلایەن ئەو كۆمپانیایەوە، نەك ئەوەی هەرێمی كوردستان بە كەمتر لە نرخی بازاڕ نەوتەكەی بفرۆشێت بەهۆی نەبوونی پشتیوانیی یاسایی و ڕەزامەندی لەلایەن عێراقەوە، بۆ ئەوەش ئامادەیە پۆستی باڵا لە كۆمپانیای سۆمۆ بە كورد بدات"، سەرچاوەكەی پەرەگراف وای وت.
عێراق بەردەوام ڕەخنەی لە دۆسیەی نەوت و گازی هەرێم هەبووە، لە نوێترین هەڵوێستیشدا محەمەد شیاع سودانی ئەمڕۆ ڕایگەیاند، ھەرێمی كوردستان لە ساڵی ٢٠١٤دا بەھۆی نەبوونی بوودجەوە ناچار بووە گرێبەست لەگەڵ كۆمپانیاكانی نەوت بكات.
بە وتەی سوودانی، ئەو گرێبەستانە نادادپەروەری و زەوتكردنیان تێدایە، چونكە كۆمپانیاكانی نەوت ناچارییەكەی ھەرێمی كوردستانیان قۆستووەتەوە بەتایبەت بەھۆی شەڕی داعش و ڕاگرتنی بودجەكەی لەلایەن حكومەتی ئەو كاتەی عێراقەوە.
ئێستاو دوای ٩ ساڵ لە ناكۆكی و ململانێی یاسایی، بەغداد لەسەر ئاستی ناوخۆ و نێودەوڵەتی براوەی دۆسیەكەیە، پاڵپشت بە بڕیارەكەی دادگای ناوبژیوانیی نێودەوڵەتی لە پاریس و بڕیاری دادگای فیدراڵی عێراق.
توركیا كە دەروازەی هەناردەی نەوتی هەرێم بە بۆریی بۆ بازاڕی جیهانی، پابەندە بە بڕیاری دادگاكەی پاریس و هەناردەی نەوتی هەرێمی ڕاگرتووە و چاوەڕێی ڕەزامەندیی بەغدایە بۆ دەستپێكردنەوەی.
ئەو دۆخە لەكاتێكدایە سەرچاوەی سەرەكیی داھاتی ھەرێم ھەناردەی نەوتە و بەو پارەیە مانگانە مووچەی فەرمەنبەران دابین دەكرێت، هەر بۆیە حكومەتی هەرێم هێشتا وادەی دابەشكردنی مووچەی مانگی ڕابردووی ئاشكرا نەكردووە.