باڵیۆزی ئێران ناوەرۆكی ڕێككەوتنی وڵاتەكەی لەگەڵ عێراق دژی حیزبە ئۆپۆزسیۆنەكانی ڕۆژهەڵات ئاشكرا دەكات
پەرەگراف
باڵیۆزی ئێران لە بەغداد جەخت لەسەر ڕۆڵی حكومەتی ناوەندیی عێراق لە پاراستنی سنوورەكان لەگەڵ ئێران دەكاتەوە، لەوبارەیەشەوە ناوەرۆكی ڕێككەوتنی ئەمنیی نێوان تاران و بەغداد ئاشكرا دەكات كە ڕەواندنەوەی ترس و دڵەڕاوكێیی ئێران دەربارەی هێزە ئۆپۆزسیۆنەكانی ناو خاكی هەرێم لەخۆ دەگرێت.
لە میانی چاوپێكەوتنێكی لەگەڵ تەلەفزیۆنی عێراقییە، محەمەد كازم سادق، باڵیۆزی ئێران لە بەغداد، باسی لە سەردانەكەی عەلی شامخانی، سكرتێری گشتیی ئەنجوومەنی باڵای ئاسایشی نەتەوەیی ئێران بۆ عێراق كرد، كە چەندین دانیشتن و گفتوگۆیان لەگەڵ حكومەتی عێراقی و یەكێتی و پارتیش ئەنجام داوە و ڕێككەوتن كراوە.
باڵیۆزی ئێران ڕایگەیاند، خاڵێكی ڕێككەوتنەكە تایبەت بووە بەو هێزە چەكدارە كوردییانەی ئێران كە لە هەرێمی كوردستان بارەگایان هەیە. حكومەتی ئێران داوا دەكات كە "پێناسەیەكی دیاریكراویان بۆ بكرێت لە چوارچێوەی ئەم وڵاتەدا، كە ئایا ئەوان لە عێراقدا ئاوارەن، یاخود نا، گەر ئاوارەن چ پێویست بە پڕچەككردن و ڕاهێنانپێكردنیان دەكات".
وەكوو باڵیۆزی ئێران لە بەغداد ئاشكرای كردووە، خاڵێكی دیكە ڕێككەوتنی ئەمنیی نێوان ئێران و عێراق تایبەتە بە بابەتی ئاڵوگۆڕی تۆمەتبارانی هەردوو وڵات.
محەمەد كازم دەشڵێت "گرنگترین خاڵی ڕێككەوتنامەكە كە بەندی یەكەمە، كۆنتڕۆڵكردنی سنوورەكانی عێراقە لەلایەن حكومەتی ناوەندییەوە". جەختیشی كردەوە كە تاران پێی وایە "عێراق یەك وڵاتە و ناكرێ دابەش بكرێت، پێویستە لەلایەن حكومەتی ناوەندییەوە بەڕێوە ببرێ".
ڕۆژی 19ی ئەم مانگە عەلی شامخانی، سكرتێری گشتیی ئەنجوومەنی ئاسایشی نەتەوەیی ئێران، سەردانی بەغدای كرد بۆ "واژووردنی بەڵگەنامەی هاوكارییە ئەمنییەكان، رەواندنەوەی هەندێ كێشەی ئەمنی و پەرەپێدانی پەیوەندییە ئابووری و بازرگانییەكان" لە نێوان ئێران و عێراق.
ماڵپەڕی نوورنیوزی ئەنجوومەنی باڵای ئاسایشی نیشتمانیی ئێران، هەمان ڕۆژ بڵاوی كردەوە، واژووكردنی بەڵگەنامەی هاوكارییە ئەمنییەكان "ڕۆڵی یەكلاكەرەوەی دەبێت لە نەهێشتنی چەكدارە دژە شۆڕشەكان (مەبەست لێی هێزە ئۆپۆزسیۆنەكانی ئێرانە) و دەستوپەیوەندەكانی زایۆنی لە سنوورەكانی باكووری ڕۆژئاوای ئێراندا".
ساڵانێكە ئێران تۆپباران و مووشەكبارانی بنكە و بارەگای هێزە ئۆپۆزسیۆنەكانی ڕۆژهەڵاتی كوردستان لەناو خاكی هەرێم دەكات و چەندین جاریش لەسەر ئاستی باڵا هۆشدارییان داوەتە بەرپرسانی هەرێم و عێراق، بەم دواییانەش هێرشەكان چڕتر و هەڕەشەكان جیددیتر بوون، سەرئەنجام بەرپرسانی هەردوو لا هاتنە سەر خەت.
حسێن ئەمیر عەبدوڵڵاهیان، وەزیری دەرەوەی ئێران، ڕۆژی 22ی ئەم مانگە ڕایگەیاند "لە چەند مانگی ڕابردوودا لە چوارچێوەی لیژنەی باڵای ئەمنیدا، گفتوگۆی گرنگمان لە بەغدا و تاران هەبووە، ئەوەش بەمەبەستی بەرەنگاربوونەوەی گرووپەكانی جێگیر لە هەرێم".
دواتریش وەزیری دەرەوەی ئێران جەختی كردەوە كە "كۆماری ئیسلامی بوونی پارتەكانی دژ بە خۆی لە هەرێمی كوردستان قبووڵ ناكات، دەبێت بنكە و بارەگاكانیان و بنكەكانی ڕاهێنانیان دابخرێن".