پەرەگراف
مەسرور بارزانی بە سەرۆكایەتیی شاندێكی باڵا گەیشتە بەغداد و لەگەڵ محەمەد شیاع سوودانی، سەرۆكوەزیرانی عێراق ڕێككەوتنێكی واژوو كرد بۆ هەناردەكردنی نەوتی هەرێم لە ڕێگەی كۆمپانیای سۆمۆوە. ڕۆیتەرز دەڵێت "ئەمڕۆ هەناردەكردنی نەوتی هەرێم دەست پێ دەكاتەوە".
ئاژانسی هەواڵی ڕۆیتەرز بڵاوی كردەوە كە "ئەمڕۆ حكومەتی هەرێمی كوردستان و حكومەتی ناوەندیی عێراق ڕێككەوتنی كۆتایی بۆ دەستپێكردنەوەی هەناردەكردنی نەوتی هەرێمی كوردستان واژوو دەكەن".
ئاژانسەكە لە زاری سەرچاوەیەك لە حكومەتی عێراقەوە ئاشكرا كردووە كە "لەلایەن حكومەتی عێراقەوە داوایەكی فەرمی ئاراستەی توركیا كراوە بۆ دەستپێكردنەوەی هەناردەكردنی نەوتی هەرێم و كەركووك، لە چەند كاتژمێری داهاتوویشدا هەناردەكردنی نەوت دەست پێ دەكاتەوە".
پاش بەڕێكەوتنی بەرەو بەغداد، سەرۆكی حكومەتی هەرێم لە تویتێكدا وتی "بەڕێگاوەم بەرەو بەغدا، بۆ گفتوگۆكردن لەبارەی قۆناغەكانی كۆتایی ڕێككەوتن لەسەر دەستپێكردنەوەی هەناردەكردنی نەوت".
فەرمانگەی میدا و زانیاریی حكومەتی هەرێمیش دەڵێت "سەرۆكوەزیرانی هەرێم لەگەڵ محەممەد شیاع سوودانی كۆدەبێتەوە. گفتوگۆ لەبارەی قۆناغی كۆتایی ڕێككەوتنی دۆسیەی نەوت و دەستپێكردنەوەی هەناردەكردنی نەوتی هەرێمی كوردستان دەكرێت".
هەریەك لە كەمال محەمەد، وەزیری سامانە سروشتییەكان بە وەكالەت و ئاوات شێخ جەناب، وەزیری دارایی و ئومێد سەباح، سەرۆكی دیوانی ئەنجوومەنی وەزیران و فارس عیسا، سەرۆكی نوێنەرایەتیی حكومەتی هەرێم لە بەغداد، ئەندامی شاندەكەی هەرێمن.