پەرەگراف
نێچیرڤان بارزانی، سەرۆكی هەرێمی كوردستان، دەڵێت "دوای لێكەوتەكانی بڕیارەكەی دەستەی ناوبژیوانی لە پاریس، ئەمڕۆ ئێمە پێمان وایە ئەو بڕیارە دەرفەتێكی باشە بۆ ئەوەی هەولێر و بەغداد چارەسەرێكی یەكجارەكی بۆ كێشەی نەوت دابنێن".
سەرۆكی هەرێم لە ڕێوڕەسمی پێكهێنانی فیرقەی یەك و دووی هێزی پێشمەرگەی كوردستان باسی لە بڕیارەكەی دادگای پاریس كرد و پێی وابوو كە "بڕیارەكە مافی دەستووریی هەرێمی كوردستانی لە دۆسیەی نەوتدا سەلماندووە، بۆیە ئێستا هەمووان دەتوانین بگەینە چارەسەرێك كە هەموان تێیدا براوە بن".
سەرۆكی هەرێمی كوردستان ئاماژەی بەوەش كرد كە لە دوای پەسەندكردنی دەستووری عێراقەوە، هەرێمی كوردستان بەردەوام داوای دەرچوواندنی یاسای نەوت و گازی عێراقی كردووە و وتی "تەنیا ئەم یاسایە دەتوانێت ماددەی 112ی دەستوور بە باشی ڕێك بخات".
نێچیرڤان بارزانی جەختی كردەوە كە ئێستاش داوا دەكەن ئەو فیدراڵیەتەی لە دەستووردا چەسپێندراوە، لە یاساكانی عێراقدا ڕەنگ بداتەوە، بۆ ئەوەی "بەڕێوەبردنی وڵات بە كردەوە لە ناوەندییەوە ببێتە فیدراڵی".
سەرۆكی هەرێمی كوردستان ئاماژەیشی بە سەردانەەی ئەمڕۆی مەسرور بارزانی، سەرۆكی حكومەتی هەرێم بۆ بەغداد كرد و وتی "پێمان وایە باشترین چارەسەر، چارەسەری ناوخۆی عێراقییانەیە و گەشبینم كە بگەینە ڕێككەوتن".
نێچیرڤان بارزانی لە وەسفی محەمەد شیاع سوودانی، سەرۆكوەزیرانی عێراقیشدا وتی "لە گفتوگۆی نێوانماندا واقیعبینی و ویستی زۆری بۆ چارەسەری كێشەكان نیشان داوە، ئەم تێڕوانینەی ئەو وای كردووە كە ئێمە لە هەرێمی كوردستان پشتیوانیی بەڕێزیان بكەین".