چاوشئۆغڵو: پەكەكە لە سلێمانی بە تەواوەتی پارتەكەی تاڵەبانیی خستووەتە ژێر ڕكێفی خۆیەوە

10-04-2023 09:05

پەرەگراف

وەزیری دەرەوەی توركیا، دەڵێت "پەكەكە لە سلێمانی پارتەكەی تاڵەبانیی بە تەواوەتی خستووەتە ژێر ‏ڕكێفی خۆیەوە و هەموو شتێكی كۆنترۆڵ كردووە، هەر بۆیە كایەی ئاسمانیمان بە ڕووی فڕۆكەخانەی ‏سلێمانیدا داخست". چاوشئۆغڵو، یەكێتی تۆمەتبار دەكات بەوەی كە "هێلیكۆپتەری لە فەڕەنسا ‏وەرگرتووە و بۆ یەپەگەی تەرخان كردووە".‏

مەولود چاوشئۆغڵو، وەزیری دەرەوەی توركیا، لە بەرنامەیەكی تەلەڤیزیۆنی (ئا هابەر)دا لە وەڵامی ‏پەیوەست بەو هێلیكۆپتەرەی لە سنووری پارێزگای دهۆك كەوتە خوارەوە، وتی "بەپێی ئەو ‏زانیارییانەی دەستمان كەوتوون، ئەو هێلیكۆپتەرانەی بەكار هێنراون، هی ئیدارەی سلێمانی، یان ڕاستتر ‏بڵێین، هی پارتەكەی تاڵەبانی و ئیدارەی سلێمانین".‏

‏"پارتەكەی تاڵەبانی ئەم هێلیكۆپتەرانە لە فەڕەنسا وەردەگرێت و بۆ ئەو تیرۆریستانە (مەبەست لێی ‏یەپەگە و هێزەكانی سووریای دیموكراتە)ی تەرخان دەكات. كایەی ئاسمانیی لەژێر كۆنترۆڵی ‏ئەمریكادایە، بۆیە ئەمریكا ئاگاداری ئەم گەشتانەیە"، چاوشئۆغلوو وا دەڵێت.‏

وەزیری دەرەوەی توركیا باسی لە دوو ئیدارەییش لەناو حكومەتی هەرێمدا كردووە و دەڵێت "لەنێو ‏حكوومەتی هەرێمدا، هەولێر هەیە و سلێمانی هەیە، ململانێی زۆر جددیی هەیە، گرژیی تا ئاستی ‏جددیش ڕوو دەدەن. ئێمە دەستوەردان لە كاروباری ناوخۆیان ناكەین، بەڵام ئەو گرژییانە كاریگەریی ‏نەرێنی لەسەر هەمووان دەبێت".‏

مەولوود چاوشئۆغڵو كە وڵاتەكەی پەكەكە و یەپەگە و هێزەكانی سووریای دیموكرات وەكوو یەك ‏تەماشا دەكات و بە "تیرۆریست" ناویان دەبات، جەختی لەوە كردووەتەوە كە فڕۆكەخانەی مەدەنیی ‏سلێمانی لەلایەن پەكەكەوە بەكار دەهێنرێت و دەڵێت "تا ئەو شوێنە دزەی كردووە".‏

‏"پەكەكە لە سلێمانی هەموو كەس و بە تایبەت پارتەكەی تاڵەبانی بە تەواوەتی خستووەتە ژێر ڕكێفی ‏خۆیەوە. ئیتر نەك تەنها پارتەكە و ئیدارە، بەڵكو دزەیان كردووەتە نێو فڕۆكەخانە و شوێنە ‏ستراتیجییەكانی دیكەش و بەردەوامن. نەیانتوانی بچنە ناو هەولێرەوە، بۆیە بەردەوام شێوازی جیاواز ‏دەگرنەبەر لەپێناو لاوازكردنی هەولێر"، چاوشئۆغلو وا دەڵێت.‏

لە وەڵامی پرسیاری ئەوەی بەرپرسە باڵاكانی یەكێتی چۆن وەڵامی توركیایان داوەتەوە؟ وەزیری دەرەوی ‏توركیا دەڵێت "ئەوان هەمیشە ڕەتی دەكەنەوە، بەڵام لەنێو پارتەكەدا وەكوو پێشتریش باسمان كردبوو، ‏ئەو كەسانەی لەگەڵیان دانیشتووین، دەڵێن ئیتر پەكەكە بە تەواوی كۆنترۆڵی پارتەكەی كردووە".‏

چاوشئۆغلو جەختیشی كردەوە كە ئۆپەراسیۆنەكانیان دژی پەكەكە لە "باكووری عێراق و سووریا" ‏بەردەوام دەبن و وتی "پەكەكە/یەپەگە لە هەر شوێنێك بن دەیانكەینە ئامانج".‏