پەرەگراف
مافی میوانداریكردنی جامی كۆنیفای 2024ـی نێوان هەرێمەكان بە كوردستان بەخشرا و یەكێتیی تۆپی پێی كوردستانیش دەڵێت: یارییەكان لە یاریگاكانی كوردستان بەڕێوە دەچن.
شوان عەزیز، بەرپرسی ڕاگەیاندنی لیژنەی ئۆڵۆمپی كوردستان، بە فەرمانگەی میدیا و زانیاریی حكومەتی هەرێمی ڕاگەیاند "یارییەكانی ئەو پاڵەوانێتییە لە یاریگاكانی سلێمانی، هەولێر، دهۆك و زاخۆ بەڕێوە دەچن".
فەرمانگەی میدیا و زانیاری دەڵێت "مانگی ئاداری ئەمساڵ (٢٠٢٣) شاندێكی كۆنیفا سەردانی هەرێمی كوردستانیان كرد، بۆ ئاگەدار بوون لە دۆخی ئەمنی و یاریگاكانی كوردستان، دوای هەڵسەنگاندنی دۆخەكە، بڕیار درا مافی میوانداریكردنی جامەكە بە كوردستان ببەخشرێت".
جەلال سەعید، وتەبێژی یەكێتیی تۆپی پێی كوردستان، ڕایگەیاند "لە ناوەڕاستی ساڵی داهاتوو (٢٠٢٤) یارییەكان دەست پێ دەكەن و ١٦ هەرێم بەشداری دەكەن".
فەرمانگەی میدیا و زانیاری بڵاوی كرووەتەوە كە "هەشت هەرێم داوای میوانداریكردنی پاڵەوانەتییەكەیان كردبوو، بەڵام دواجار مافی میوانداریكردنی چوارەمین وەشانی جامەكە بە هەرێمی كوردستان بەخشرا".
لەبارەی ئامادەكارییەكان بۆ پێشوازیكردن لە هەڵبژاردەی هەرێمەكان و ئامادەیی یاریگاكانی كوردستان، بەرپرسی ڕاگەیاندنی لیژنەی ئۆڵۆمپی دەڵێت "ئامادەكاریی تەواو دەكرێت و لە ئامادەباشیدا دەبین بۆ هەر ئەگەرێك".
كۆنیفا، ڕێكخراوێكی جیهانیی قازانجنەویستە و پشتگیری لە ھەڵبژاردەكانی تۆپی پێی هەرێمەكان دەكات. لە مانگی حوزەیرانی ساڵی ٢٠١٣ دامەزراوە و یەكەم پاڵەوانێتیش لە مانگی حوزەیرانی ساڵی ٢٠١٤ بە بەشداریی ١٢ هەڵبژاردە لە سوید بەڕێوە چوو.