پەرەگراف
بەپێی نوێترین ئامار، لە ماوەی چوار مانگی سەرەتای ئەمساڵدا 20 كرێكار گیانیان لەدەست داوە و لە ساڵی 2022یشدا 59 كرێكار گیانیان لەدەست داوە. سەندیكا و ڕێكخراوەكان لە دۆخی خراپی كرێكاران نیگەرانن و سەرۆكی حكومەتی هەرێمیش دەڵێت: بە یاسامافەكانی كرێكارانمان مسۆگەر كردووە.
ئەمڕۆ یەكی ئایار، ڕۆژی جیهانیی كرێكارانە، چالاكیی جۆراوجۆر لەسەر ئاستی جیهان بەو مەبەستە بەڕێوە دەچێت و لە هەرێمیكوردستانیش كرایە پشوو، بەڵام زۆرینەی كرێكاران خۆیان ئەمڕۆیش لەسەر كار بوون.
بڵاوكراوەی دەنگی كرێكار كە كار لەسەر پرسەكانی پەیوەست بە كرێكاران دەكات، ئاماری چوار مانگی ڕابردووی بوونە قوربانییكرێكارانی بڵاو كردەوە و دەڵێت " لە هەولێر پێنج كرێكار و، سلێمانی شەش كرێكار و، دهۆك دوو و هەڵەبجەیش یەك كرێكار لە كاتی كارداگیانیان لەدەست داوە".
هەروەها بڵاوكراوەی دەنگی كرێكار ئامارەكانی ساڵی 2002ی ڕاگەیاند و دەڵێت "لە هەولێر 24 كرێكار و، سلێمانی 21 و، دهۆك نۆ وهەڵەبجە پێنج كرێكار گیانیان لەدەوست داوە".
چالاك رەئوف، سەرۆكی لقی سلێمانیی سەندیكای كرێكارانی كوردستان، رایگەیاند، یاسای كار لە ساڵی 2022 لە پەرلەمانی كوردستان پەسەند كرا، زۆرێك لە ماف و داواكانی كرێكارانی كوردستانی تێدا پەسەند كراوە. هەروەها دوو یاسای جوانی بەركار هەن كە یاسایژمارە 39ی ساڵی 71ی خانەنشینی و دەستبەری كۆمەڵایەتی، لەگەڵ یاسای كاری ژمارە 71ی ساڵی 1987ن، بەڵام حكومەت نەیتوانیوە یاساكان وەكوو خۆیان جێبەجێ بكات.
وتیشی "كار بۆ ئەوە دەكەین، لەگەڵ كەرتی تایبەت پڕۆژەی نیشتەجێبوون بۆ ئەو كرێكارانەی دابین بكرێت، كە له كەرتی تایبەت كاردەكەن و مووچەكانیان له سەرووی 400 هەزار دینارە".
مەسرور بارزانی سەرۆكی حكومەتی هەرێمی كوردستان، لە پەیامی ڕۆژی جیهانیی كرێكاراندا دەڵێت "حكومەتی هەرێمی كوردستان،بەردەوام دەبێت لە پرۆسەی چاكسازییەكانی لە پێناو باشتركردنی گوزەرانی كرێكارانی كوردستان".
دەشڵێت "پەسەندكردنی یاسای كار لە هەرێمی كوردستان لە ماوەی رابردوودا، بەشێكە لە چاكسازییەكانی كابینەی نۆیەم لە بواریباشتركردنی ژیان و مسۆگەركردنی مافەكانی كرێكاران لە رووی تەندروستی و سەلامەتی پیشەیی و دابینكردنی مافە یاساییەكانیان وسنووردانان بۆ هەموو جۆرە ستەم و چەوساندنەوەیەكی كرێكاران".
بەڵام ڕێكخراوەكان و چالاكانی بواری مافەكانی كرێكاران، پێیان وایە حكومەت سستە لە جێبەجێكردنی یاساكان و، ئەو یاسایەش نەبووەتەهۆی گۆڕانكاری لە ژیانی كرێكارندا.
نەزمی موسا، جێگری بەڕێوەبەری گشتیی كار و دەستەبەری كۆمەڵایەتی، دەڵێت "لە ساڵی رابردوودا، بە گشتی ژمارەی كرێكارە دەستەبەركراوەكان نزیكەی ١٣٨ هەزار كرێكار بوون، هاوكات لە سێ مانگی ئەمساڵدا، تا ئێستا هەشت هەزار كرێكار دەستەبەركراون لەوژمارەیەش شەش هەزار و ٥٠٠ كرێكار خۆماڵیین و ئەوانی دیكە بیانیین".
نەزمی موسا وتیشی "خۆشبەختانە ساڵانە تۆماركردنی كرێكاران بەرەو زیادبوون دەڕوات و پابەندبوونی خاوەنكارەكان بە رێنماییەكان زیاترە. لە ساڵی رابردوودا، بە گشتی ژمارەی كرێكارە دەستەبەركراوەكان نزیكەی ١٣٨ هەزار كرێكار بوون، هاوكات لە سێ مانگیئەمساڵدا، تا ئێستا هەشت هەزار كرێكار دەستە بەركراون لەو ژمارەیەش شەش هەزار و ٥٠٠ كرێكار خۆماڵیین و ئەوانی دیكە بیانیین".