پەرەگراف
پەرلەمانتارێكی كورد لە پەرلەمانی عێراق، لە دادگای باڵای فیدراڵی سكاڵای لەسەر كورسیی پێكهاتەكان لە پەرلەمانی كوردستان تۆمار كرد. سۆران عومەر دەڵێت "داوای هەڵوەشاندنەوەی ئەو ماددە یاساییەم كردووە كە ١١ كورسیی كۆتای بە سێ پێكهاتەی توركمان و مەسیحی و ئەرمەن بەخشیوە، بەڵام پێكهاتەكانی دیكەی بێ بەش كردووە".
سۆران عومەر، ئەندامی فراكسیۆنی كۆمەڵ لە پەرلەمانی عێراق، لە لێدوانێكدا بۆ پەرەگراف وتی "بەپێی یاسای ژمارە دووی ساڵی 2009 كە هەمواری چوارەمی یاسای هەڵبژاردنی ساڵی 1992ی پەرلەمانی كوردستانە، پێنج كورسیی پەرلەمان بە توركمان و پێنج كورسی بە مەسیحی و یەك كورسی بە ئەرمەن دراوە، ئەمەش پێچەوانەی یاسای پاراستنی مافی پێكهاتەكان - ژمارە 5ی ساڵی 20015ی پەرلەمانی كوردستانە".
ئەو پەرلەمانتارە دەڵێت "ئەو سێ پێكهاتەیە مافی پێكهاتەكانی دیكەیان خواردووە و دابەشكردنی كورسییەكان بەو شێوەیە، پێچەوانەی ماددەكانی 13، 16 و 20ی دەستووری عێراقە".
سۆران عومەر بۆ پەرەگراف وتیشی "دەبێت كورسیی پێكهاتەكان بە شێوەیەكی دادپەروەرانە و بەپێی پێكهاتەی حەقیقی و پێوەر دابەش بكرێتەوە".
بەپێی ماددەی هەشتەمی (یاسای ژمارەی 2ی ساڵی 2009ی یاسای مەمواركردنی چوارەمی یاسای هەڵبژاردنی ئەنجوومەنی نیشتمانیی كوردستان - عێراق ژمارە 1ی ساڵی 1992ی هەمواركراو)، پێنج كورسی بۆ توركمان و پێنج كورسی بۆ كلدان سریان ئاشووری و یەك كورسی بۆ ئەرمەن تەرخان دەكرێت كە پاڵێوارانی هەریەك لەو پێكهاتانە كێبڕكێی لەسەر دەكەن.
پێكهاتەكان لە هەرێمی كوردستان كە پێكهاتەی نەتەوەیی و ئایینین، نەتەوەكان بریتین (توركمـان، كـلدانی، سـریانی، ئاشووری و ئەرمـەنی)، كە لە ڕووی ئایینییەوەلا بریتین لە (مەسیحی، ئێزیدی، سابیئەی مەندائی، كاكەیی، شەبەك، فەیلی و زەردەشتی).
پرسی كورسیی پێكهاتەكان، كێشەیەكی سەرەكیی نێوان حیزبەكانی هەرێمی كوردستانیشە بۆ هەڵبژاردنی ئەم جارە، كە پاش چەندین كۆبوونەوە، تا ئێستا بە تایبەت پارتی و یەكێتی لەسەر ئەو پرسە ڕێكنەكەوتوون.