یەكگرتوو و كۆمەڵ پێشوازيی گەرم لە لاهوور شێخ جەنگی دەكەن، بەڵام خۆیان لە ناوهێنانی پۆستەكەی دەپارێزن
پەرەگراف
یەكگرتوو و كۆمەڵ لەسەر ئاستی باڵا پێشوازییان لە لاهوور شێخ جەنگی كرد، بەڵام هاوشێوەی گۆڕان خۆیان لە ناوهێنانی پۆستەكەی پاراست. لە كۆبوونەوەكانیشدا جگە لە دۆخی سیاسیی خراپی هەرێم، پرسی هەڵبژارنی پەرلەمانی كوردستان و هەڵبژاردنی ئەنجوومەنی پارێزگاكانی عێراق لە كەركووك و ناوچە دابڕێندراوەكان گفتوگۆیان لەبارەوە كراوە.
هەرچەندە لاهوور شێخ جەنگی پاڵپشت بە بڕیارێكی دادگای ئاسایشی هەولێر، سوورە لەسەر بەردەوامبوونی لە پۆستی "هاوسەرۆكی یەكێتی" و لەژێر ئەو ناوەدا دەستی بە جووڵەی سیاسی كردووەتەوە، بەڵام هەریەك لە گۆڕان، كۆمەڵ و یەكگرتوو كە تا ئێستا سەردانی كردوون و پێشوزایی گەرمیان لێ كردووە، ئامادە نەبوون هاوشێوەی بەر لە ڕووداوەكانی هەشتی تەمووزى 2021، بە هاوسەرۆكی یەكێتی ناوی ببەن و بەبێ پۆست ناوی دەهێنن.
پاش ئەوەی لاهور شێخ جەنگی لە ڕۆژی 19-3-2023 وەكوو "هاوسەرۆكی یەكێتی" دەستی بە جووڵەی سیاسی كردەوە و لە مەكۆی سەرەكی گۆڕان لەگەڵ عومەر سەید عەلی و بەرپرسانی باڵای ئەو بزووتنەوەیە كۆبووەوە، ئەمڕۆیش لە هەولێر لەلایەن سەلاحەدین بەهادین و عەلی باپیرەوە پێشوازیی لێ كرا.
بەپێی ناوەرۆكی ڕاگەیاندراوەكانی لاهور شێخ جەنگی، لە كۆبوونەوەكاندا گفتوگۆ دەربارەی ژمارەیەك پرس كراون، لەناویاندا "تێپەڕاندنی ئەم قۆناغە"ی هەرێمی تێ كەوتووە، كە لاهوور شێخ جەنگی دەڵێت "هەڵبژاردن تەنیا چارەسەرە بۆ ئەم قۆناغە، بۆیە پێویستە پەلە بكرێت لە ئەنجامدانی هەڵبژاردنێكی پاك و بێگەرد لە وادەی دیاریكراوی خۆیدا".
لاهوور شێخ جەنگی دەڵێت، لەبارەی دۆخی كەركووك و ناوچە جێناكۆكەكانیشەوە "پرۆژەیەكی نیشتمانی"یان ئامادە كردووە و لەگەڵ یەكگرتوو و كۆمەڵ گفتوگۆیان دەربارەی كردووە.
لە چوارچێوەی پرۆژەكەیدا، لاهوور شێخ جەنگی داوای لەو دوو حیزبە كردووە كە پاڵپشت بن بۆ ئەوەی "لە هەڵبژاردنی داهاتووی ئەنجوومەنی پارێزگاكانی عێراقدا، كورد بە یەك لیست بەشداریی پرۆسەی هەڵبژاردنی ئەنجوومەنی پارێزگاكانی عێراق بكات".
لاهوور شێخ جەنگی سوپاسی سەڵاحەدین بەهادین و عەلی باپیری كردووە كە وەكوو خۆی دەڵێت "پشتیوانی"یان دەربڕیەوە بۆ ئەوەی كە "كورد لە كەركووك و ناوچە دابڕێندراوەكان بە یەك لیست بەشداریی هەڵبژاردن بكات"
لە سەردانەكانی ئەمڕۆدا، هەریەك لە ژینۆ محەمەد، شادمان مەلا حەسەن و چەتۆ ساڵح یاوەریی لاهوور شێخ جەنگییان كرد كە لاهوور شێخ جەنگی خۆیی بە "هاوسەرۆكی یەكێتی" و ئەوانیشی بە "ئەندامانی سەركردایەتیی یەكێتی" ناوی بردووە.
لە هەردوو ڕاگەیەندراوی كۆمەڵی دادگەری و یەكگرتووی ئیسلامیدا سەبارەت بە سەردانەكە، ناوی پۆستی لاهوور شێخ جەنگی و هیچ كام لە ئەندامانی شاندەكەی نەهێنراوە، هەر وەكوو چۆن پێشتریش گۆڕان خۆی لە ناوهێنانی پۆستەكانیان پاراست.
لە ڕاگەیەندراوی یەكگرتوودا هاتووە "لە دیدارەكەدا بارودۆخی سیاسیی هەرێمی كوردستان و عێراق و ناوچەكە گفتوگۆی لەبارەوە كرا. ئەمینداری یەكگرتوو جەختی كردەوە لەسەر زەرورەتی چاككردنەوەی دۆخی ناوخۆی هەرێم و چارەسەری ئاشتییانە و یاسایی كێشەكان".
سەلاحەدین بەهادین ڕایگەیاندووە "یەكگرتوو لەگەڵ ئەنجامدانی هەڵبژاردنی پەرلەمانی كوردستانە لە كاتی خۆیدا و بە سازكردن و ئامادەكردنی زەمینەی سەرخستنی پرۆسەكە".
كۆمەڵی دادگەرییش دەڵێت "لە كۆبوونەوەیەكی دۆستانەدا باسی بارودۆخی هەرێمی كوردستان و ناوچەكە كرا، هەردوولا هاوڕابوون پێویستە لەژێر هیچ پاساوێكدا هەڵبژاردنی پەرلەمانی كوردستان دوانەخرێت و لە كاتی دیاریكراودا پاش هەمواری یاسای هەڵبژاردنەكان و بەپێی ڕێكەوتنی لایەنەكان، هەڵبژاردنەكە ئەنجام بدرێت".
كۆمەڵ دەشڵێت "لە كۆبوونەوەكەدا هەڵبژاردنی پارێزگای كەركووكیش گفتوگۆی لەبارەوە كرا و بە پێویست زانرا لایەنە كوردییەكان هەوڵ بدەن لەپێناو لەدەستنەدانی كەركووك و ناوچە دابڕێنراوەكان، هەماهەنگی و ڕێكەوتنیان هەبێت".
ئەم جووڵە سیاسییانەی لاهوور شێخ جەنگی، دوای ئەوە دێت كە لە ٢١-٢-٢٠٢٣ لە نامەیەكدا بۆ بافڵ تاڵەبانی و سەركردایەتی یەكێتی، ئاگاداری كردنەوە كە دەسەڵاتە یاسایی و پەیڕەوییەكانی خۆی وەك هاوسەرۆكی ئەو حیزبە بەكار دەهێنێت.
نامەكەی لاهور شێخ جەنگی پشتی بە بڕیارەكەی دادگای ئاسایشی هەولێر بەستووە كە ئاڕاستەی ئەنجومەنی باڵای بەرژەوەندی سیاسی یەكێتی كرد و لاهوور شێخ جەنگی بە هاوسەرۆكی یەكێتی لەقەڵەم دەدات هاوشانی بافڵ تاڵەبانی.