نرخی مریشك هاڕەی كردووە و خاوەنی كێڵگە پەلەوەرییەكان دەڵێن: بەهۆی بێپلانیی حكومەتەوەیە
پەرەگراف
ژووری بازرگانی و پیشەسازیی سلێمانی دەڵێت "نرخی مریشك هاڕەی كردووە و خاوەنی كێڵگە پەلەوەرییەكان زەرەر دەكەن". خاوەنی كێڵگە پەلەوەرییەكانیش دەڵێن، لە ئێستادا "كیلۆیەك مریشك لەناو پرۆژە بە هەزار و دینار دەفرۆشن، كە زیاتر لە سێ هەزار دینار لەسەر خاوەن پرۆژەكان دەكەوێت".
خاوەنی كیڵگە پەلەوەرییەكان لەگەڵ ژووری بارزگانیی سلێمانی كۆبوونەوە و، یاسین ڕەحیم، جێگری سەرۆكی ژووری بازرگانی و پیشەسازیی سلێمانی، دەڵێت "بەرپرسیارێتییەكی ئەخلاقی و پیشەییمان بەرانبەر ئەندامەكانمان و پرۆژەكان هەیە، نامانەوێت هەڵەی كاركردن یان هاوردە و هەناردەكردن ببێتە هۆی زیانگەیاندن بە خاوەن پرۆژەكانمان".
نازم عەبدوڵڵا، سەرۆكی كۆمەڵەی كێڵگە پەلەوەرییەكان، هۆكاری بەرز و نزمیی نرخی مریش بۆ "بێپلانیی حكومەت دەگەڕێنێتەوە و دەڵێت "مریشك دابەزێت و بەرز ببێتەوە، خەتای حكومەتی هەرێمە. ئێمە دەیان جار داوامان لە حكومەت كردووە نرخێكی یەكگرتوو بۆ مریشك دیاری بكات".
یەكێك لە كێشەی خاوەن كێڵگەكانی پەلەوەری، ڕێگریی جاروبارە لە هەناردەی مریشك بۆ پارێزگاكانی عێراق بە تایبەت لەلایەن قائیمقامی كەلارەوە، كە وەكوو خاوە كێڵگەكانی پەلەوەری دەڵێن، بە پاساوی هەرزانكردنی مریشك لە ناوخۆدا ئەو كارە دەكات.
سەرۆكی كۆمەڵەی كێڵگە پەلەوەرییەكان دەڵێت "لە قەڵادزێوە تاكوو كەلار 180 هەزار كەس لەم كەرتەدا كار دەكەن و سەرمایەكەی بە 20 ملیار دۆلار دەخەمڵێندرێت، كارێكی بێ مانا و هەڵەیە ئایندەمان لەژێر دەستی قائیمقامی كەلاردا بێت".