پارتی: هەڵبژاردن لە وادەی خۆیدا؛ قوباد تاڵەبانی: هەندێك خاڵی ناكۆك لەسەر كورسیی كۆتاكان ماوە
پەرەگراف
باڵیۆزی بەریتانیا لە بەغداد بۆ گفتوگۆ دەربارەی كێشە ناوخۆییەكانی هەرێم و پەیوەندییەكانی هەرێم و بەغداد، بە جیا لەگەڵ بەرپرسانی هەرێم كۆبووەوە. پارتی جەخت لە ئەنجامدانی هەڵبژاردن لە وادەی خۆی دەكاتەوە و قوباد تاڵەبانیش دەڵێت "تەنها هەندێك خاڵی ناكۆك لەسەر كورسیی كۆتاكان ماوە، كە ئەوانیش قابیلی چارەسەركردنن و گەشبینین".
مایك برایسن ڕیچاردسن، باڵیۆزی بەریتانیا لە عێراق و ڕۆزی كەیڤ، كونسوڵی گشتیی بەریتانیا لە هەرێمی كوردستان، بە جیا لەگەڵ مەسعود بارزانی، سەرۆكی پارتی دیموكرات و مەسرور بارزانی، سەرۆكی حكومەتی هەرێم و قوباد تاڵەبانی، جێگری سەرۆكی حكومەتی هەرێم كۆبووەوە.
بەپێی هەواڵی ماڵپەڕێ حكومەتی هەرێم، لە كۆبوونەوەی سەرۆكی حكومەت و باڵیۆزی بەریتانیا، "گفتوگۆ لەبارەی بارودۆخی ناوخۆی هەرێمی كوردستان و گرنگیی چارەسەركردنی كێشەكانی هەرێم و حكومەتی فیدراڵ كرا".
سەرۆكی حكومەت ئاماژەی بەوە داوە كە "دوای واژووكردنی ڕێككەوتنی تایبەت بە نەوت، هەرێمی كوردستان هەموو ئەرك و پابەندییەكانی خۆی جێبەجێ كردووە". مەسرور بارزانی وتووشیەتی "چاوەڕوانین حكومەتی فیدراڵ ئەرك و بەرپرسیاریەتییەكانی خۆی بەرامبەر هەرێمی كوردستان جێبەجێ بكات".
دەربارەی دۆخی هەرێمی كوردستانیش، هەردوولا "هاوڕابوون لەسەر گرنگیی ئەنجامدانی هەڵبژاردنی پەرلەمانی كوردستان لە كاتی دیاریكراوی خۆی لەمساڵدا".
لە كۆبوونەوەی مەسعود بارزانی مایك برایسن ڕیچاردسنیشدا جەخت لە "پەرەپێدان و باشتركردنی پەیوەندییەكانی نێوان حكومەتی هەرێمی كوردستان و حكومەتی فیدڕاڵ" كراوەتەوە.
بارەگای بارزانی دەڵێت "هەر لەو دیدارەدا بارودۆخی ناوخۆی هەرێمی كوردستان تاوتوێ كرا و جەخت لە پێویستیی ئەنجامدانی هەڵبژاردن لە كاتی دیاریكراوی خۆی كرایەوە".
"لە ماوەی ڕابردوودا كۆبوونەوەكان لەگەڵ لایەنە سیاسییەكان لەسەر پرسی هەڵبژاردن ئیجابی بووە و تەنها هەندێك خاڵی ناكۆك لەسەر كورسیی كۆتاكان ماوە، كە ئەوانیش قابیلی چارەسەركردنن و گەشبینین لە ماوەی نزیكی داهاتوودا ڕێككەوتنی كۆتایی بكرێت"، ئەمە قسەی قوباد تاڵەبانییە دوای كۆبوونەوەی لەگەڵ باڵیۆزی بەریتانیا.
جێگری سەرۆكی حكومەتی هەرێم دەشڵێت "لەگەڵ مارك برایسن ڕیچاردسن گفتوگۆشمان كرد لەسەر كێشە ناوخۆییەكانی كوردستان. باسمان لەوە كرد لە ئێستادا هەندێك هەوڵ هەیە بە ئاراستەی هێوربوونەوە و چارەسەركردنی كێشەكان".