پەرەگراف
حكومەتی هەرێم دووەم دەروازەی نێودەوڵەتی لەگەڵ توركیا دەكاتەوە. دەروازەكە دەكەوێتە سنووری ئیدارەی سۆران و سەرەتا تەنیا بۆ هاتوچۆی گەشتیاری دەبێت.
دەروازە نێودەوڵەتییەكە ناوی (زێت)ـە و دوای ساڵێك لە كاركردنی بەردەوام لەسەر پڕۆژەی دروستكردنی ڕێگای سەرەكیی دەروازەكە لە نێوان هەرێمی كوردستان و توركیا، ئەم هەفتەیە بە فەرمی دەكرێتەوە.
هەڵگورد شێخ نەجیب، سەرپەرشتیاری ئیدارەی سەربەخۆی سۆران، بە فەرمانگەی میدیا و زانیاریی حكومەتی هەرێمی كوردستانی ڕاگەیاند "لە مەراسیمێكی فەرمیدا و بە ئامادەبوونی بەرپرسانی حكومەتی هەرێمی كوردستان و توركیا، ئەم هەفتەیە بە فەرمی سنووری نێودەوڵەتیی زێت بە ڕووی گەشتیاراندا دەكرێتەوە، لە قۆناغی دووەمیشدا كار بۆ ئەوە دەكرێت تێیدا بزاڤی بازرگانی وەگەڕ بخرێت".
هەروەها بۆ مەبەستی تاوتوێكردنی دۆخی ئەمنیی ناوچەكە، ڕۆژی یەكشەممە ٧ـی ئایار، فەریق ڕوكن عیسا عوزێر، سەرۆكئەركانی وەزارەتی كاروباری پێشمەرگەی حكومەتی هەرێمی كوردستان، بە یاوەریی چەند بەرپرسێكی سەربازی سەردانی دەروازەكەیان كرد و لەلایەن قایمقامی قەزای مێرگەسۆریشەوە، بۆ یەكەمجار ئاڵای كوردستان لەو دەروازەیە هەڵدرا.
دەروازەی نێودەوڵەتیی زێت، كە لە دوای ئیبراهیم خەلیل دەبێت بە دووەم دەروازەی نێودەوڵەتی لە نێوان هەرێم و توركیا، دەكەوێتە سنووری ناحیەی شێروانمەزن، لە قەزای مێرگەسۆری سەر بە ئیدارەی سەربەخۆی سۆران.