پەرەگراف
وەزیری دارایی حكومەتی هەرێم ڕایدەگەیەنێت "ڕاگرتنی نەوت كێشەی گەورەی بۆ مووچەی فەرمانبەران دروست كردووە و هیوادارین حكومەتی عێراق بەڵێنەكانی خۆی بۆ دابینكردنی مووچەی فەرمانبەران بباتە سەر".
ئاوات شێخ جەناب لە كۆبوونەوەی لەگەڵ بەرپرسی نووسینگەی پەیوەندییەكانی یەكێتیی ئەورووپا لە هەرێمی كوردستان، وتیشی "ئەولەویاتی ئێمە جێبەجێكردنی ڕێكەوتنی نێوان هەرێم و بەغدایە لە سەر نەوت و بودجە، لەو چوارچێوەیەشدا هەرێمی كوردستان هەموو داواكارییەكانی جێبەجێ كردووە".
وەكوو وەزیری دارایی ئاماژەی پێ داوە، ئێستا حكومەتی هەرێم "چاوەڕێی عێراق و توركیایە بۆ دەستپێكردنەوەی هەناردەكردنەوەی نەوتی هەرێم و چارەسەركردنی ئەو كێشە سیاسی و تەكنیكییانەی لەبەردەم پرۆسەكەدا ماون".
ئەم قسانەی وەزیری دارایی لە كاتێكدایە دوێنێش سەرۆكی حكومەتی هەرێم ڕایگەیاند "دوای واژووكردنی ڕێككەوتنی تایبەت بە نەوت، هەرێمی كوردستان هەموو ئەرك و پابەندییەكانی خۆی جێبەجێ كردووە". وتیشی "چاوەڕوانین حكومەتی فیدراڵ ئەرك و بەرپرسیاریەتییەكانی خۆی بەرامبەر هەرێمی كوردستان جێبەجێ بكات".
لە كۆبوونەوەی لەگەڵ د. تۆركیلد بیوگ، بەرپرسی نووسینگەی پەیوەندییەكانی یەكێتیی ئەورووپا، ئاوات جەناب نووری، وەزیری دارایی و ئابووریی حكومەتی هەرێم، ڕێكەوتنی هەناردەكردنەوەی نەوت و پشكی هەرێم لە پرۆژەیاسای بوودجەی فیدراڵیی ڕوونكردووەتەوە و ڕایگەیاندووە "بنەمای ڕێكەوتنەكە دەگەڕێتەوە بۆ سەرەتای پێكهێنانی حكومەتی نوێی عێراق".
وەزارەتی دارایی دەڵێت "بەرپرسی نووسینگەی پەیوەندییەكانی یەكێتیی ئەورووپا پشتیوانیی یەكێتیی ئەورووپای بۆ ڕێكەوتنی هەرێمی كوردستان و بەغداد دوپات كردەوە و هیوای خواست بە زووترین كات هەڵبژاردن لە هەرێمی كورستان ئەنجام بدرێت و كێشە سیاسییەكان چارەسەر بكرێن".