پەرەگراف
دامەزراوەی باڵای هەڵبژاردنەكانی توركیا ئەنجامی بەرایی جیاكردنەوەی لەسەدا ٩٩ی دەنگەكانی هەڵبژاردنی ڕاگەیاند، بەپێی ئەنجامەكە هیچ كام لە كاندیدەكانی سەرۆكایەتیی نەیانتوانی (زیاتر لە ٥٠٪ - نیوە کۆ یەک)ی دەنگەكان بەدەست بهێنن و یەكلاكردنەوەی ئەو پۆستە دەكەوێتە خولی دووەمی هەڵبژاردن.
ئەحمەد یەنەر، سەرۆكی دامەزراوەی باڵای هەڵبژاردنەكانی توركیا، ڕایگەیاند "تا كاتژمێر ٩:٤٥ خولەكی ئەمڕۆ، ڕەجەب تەیب ئەردۆغان لەسەدا ٤٩.٤٠ و كەمال كڵچدارئۆغڵوو لەسەدا ٤٤.٩٦ و سینان ئۆغان لەسەدا ٥.٢٠ و موحەڕەم ئینجە (كاندیدی كشاوە) لە سەدا ٠.٤٤ی دەنگەكانیان بە دەست هێناوە".
سەرۆكی دامەزراوەی باڵای هەڵبژاردنەكانی توركیا وتیشی "لە ناوخۆی توركیا ژمارەی سندووقەكان ١٩٢ هەزار و ٢١٤ سندووق بووە، تا كاتژمێر ٩:٤٥، ١٩٢ هەزار و ١٨٧ سندووق كراونەتەوە، گوتی، بەوەش ڕێژەی كردنەوەی سندووقەكان لە ناوخۆی وڵات گەیشتووەتە لەسەدا ٩٩".
هەر بەپێی داتاكانی دامەزراوەی هەڵبژاردنی توركیا، ژمارەی سندووقە نەكراوەكانی ناوخۆی وڵات تەنیا "٢٧" سندووقن. لە دەرەوەی وڵاتیش نۆ هەزار و ٥٩٤ سندووق هەبووە و هەشت هەزار و ٦٥یان كراونەتەوە، هەزار و ٥٢٩یشیان هێشتا نەكراونەتەوە.