پەرەگراف
دامەزراوەی باڵای هەڵبژاردنی توركیا كۆتایی بە پڕۆسەی جیاكردنەوەی دەنگەكان هێنا. بە فەرمی و بۆ یەكەم جار هەڵبژاردنی سەرۆكایەتیی كۆماری توركیا كەوتە خولی دووەم.
ئەحمەد یەنار، سەرۆكی دامەزراوەی باڵای هەڵبژاردنەكانی توركیا، لە كۆنگرەیەكی ڕۆژنامەوانیدا ڕایگەیاند "هیچ كاندیدێكی سەرۆكایەتی نەیتوانی 50+1 بەدەست بهێنێت. ڕەجەب تەیب ئەردۆغان 49.51%، و كەمال كلچدارئۆغلوو 44.88% و سینان ئۆغان 5.17%ی دەنگەكانیان بەدەست هێناوە".
ئەحمەد یەنار وتیشی، خولی دووەمی هەڵبژاردن لەنێوان ئەردۆغان و كلچدارئۆغلۆوودا دەبێت كە لە 28ی ئەم مانگە بەڕێوە دەچێت.
سەرۆكی دامەزراوەی باڵای هەڵبژاردنەكانی توركیا ڕایشیگەیاند "ڕۆژی 19ی ئایار ئەنجامی فەرمی و كۆتایی هەڵبژاردن ڕادەگەیەنین".
بۆ یەكەم جارە لە مێژووی توركیادا هەڵبژاردنی سەرۆكایەتی دەچێتە خوولی دووەمەوە. هەر لەمڕۆوە بانگەشەی خولی دووەمی هەڵبژاردنی دەست پێ دەكات و تا وادەی ئەنجامدانی نزیكەی 50 هەزار دەنگدەری نوێ زیاد دەبن.