پەرەگراف- دهۆك
پرۆسەی بەئەلیكترۆنی كردنی بەشەخۆراكی مانگانە لە پارێزگای دهۆك جێبەجێ كراوە و جێگری پارێزگاری دهۆك داوا لە هاووڵاتیان دەكات سەردانی بنكەكانی تایبەت بە كاراكردنی پسووڵەكە بكەن.
پاش بڕیاری سەرۆكوەزیرانی عێراق لەمساڵدا بۆ بەئەلیكترۆنیكردنی پسووڵەی خۆراك لە ماوەیەكی كورتدا، پرۆسەكە لە ژمارەیەك پارێزگای عێراق تەواو كراوە، لە هەرێمی كوردستانیش تەنها لە پارێزگای دهۆك جێبەجێ كراوە و بڕیارە لە پارێزگاكانی دیكەیش دەست پێ بكرێت.
ماجید سەیدساڵح، جێگری پارێزگاری دهۆك، لە كۆنگرەیەكی ڕۆژنامەوانیدا ڕایگەیاند "بەڕێوەبەرایەتییە پەیوەندیدارەكان هەموو ئامادەكارییەكیان بۆ كاراكردنی پسووڵەی ئەلیكترۆنیی بەشەخۆراكی مانگانەی هاووڵاتیان تەواو كردووە، 147 بنكە لە شارۆچكە و شارۆچكەكان بۆ ئەو مەبەستە كراونەتەوە".
پرۆسەی كاراكردنی پسووڵە ئەلیكترۆنییەكان لەمڕۆوە دەستی پێ كردووە و تا دوو مانگی دیكە بەردەام دەبێت. جێگری پارێزگاری دهۆك جەختی كردەوە كە دەبێت هاووڵاتیان خۆیان سەردانی بنكەكان بكەن، چونكە ئەگەر پسووڵەی ئەلیكترۆنیی كارا نەكرێت، هاووڵاتی هیچ سوودی لێ نابینێت".