پەرەگراف
جێگری یەكەمی سەرۆكی پەرلەمانی عێراق ئاشكرای كرد، پەرلەمانی عێراق ڕۆژی دووشەممە 22-5-2023، دەست بە دەنگدان لەسەر پرۆژەیاسای بوودجەی گشتی دەكات.
مەندەلاوی لە لێدوانێکی تایبەتدا بۆ ماڵپەڕی شەفەقنیووز ڕایگەیاند "هیچ لەمپەرێک لەبەردەم پەسەندکردنی پرۆژەیاسای بوودجەدا نییە و هەموو کوتلە سیاسییەکان لەسەری ڕێککەوتوون".
ئەنجوومەنی وەزیرانی عێراق ڕۆژی ١٣-٣-٢٠٢٣ پرۆژەیاسای بوودجەی فیدراڵی بۆ ساڵانی دارایی ٢٠٢٣، ٢٠٢٤ و ٢٠٢٥ پەسەند كرد و لە ڕۆژی ١٦ی هەمان مانگ بە فەرمی ڕادەستی پەرلەمانی كرد.
پشكی هەرێمی كوردستان لە پڕۆژەی بودجەكەدا بە لە سەدا ١٢.٦ جێگیر كراوە، ئەوەش لەسەر بنەمای ڕێككەوتنی نێوان هەرێم و بەغداد.
دوو ڕۆژ دواتر مەسرور بارزانی ڕایگەیاند "پێشوازی لە پەسەندكردنی ڕەشنووسی پڕۆژەیاسای بودجەی فیدراڵ لەلایەن ئەنجومەنی وەزیرانی عێراقەوە دەكەن و بە هەماهەنگی لەگەڵ حكومەتی فیدراڵ، میكانیزم و ڕێكاری پێویست دادەنێن بۆ ئەوەی بڕگەكانی ئەم یاسایە لەبەرژەوەندی هەرێمی كوردستان و عێراق جێبەجێ بكرێت".
حكومەتی هەرێمی كوردستان داوا دەكات ئەم پڕۆژەیاسایە لە ئەنجوومەنی نوێنەرانی عێراقیش لە ماوەیەكی نزیكدا پەسەند بكرێت، تاكو هەرچی زووە بخرێتە بواری جێبەجێ كردنەوە.