سەرۆكی هەرێم: داوا لە لایەنەكانی هاوپەیمانیی بەڕێوەبردنی دەوڵەت دەكەین پابەندی ڕێككەوتنەكان بن
پەرەگراف
سەرۆكی هەرێمی كوردستان "نیگەرانیی قووڵ" لەبارەی گۆڕانكارییەكانی ناو پرۆژەیاسای بوودجە دەردەبڕێت و داوا لە هاوپەیمانیی بەڕێوەبردنی دەوڵەت دەكات پابەندی ڕێككەوتنەكان بن.
نێچیرڤان بارزانی لە ڕاگەیەندراوێكدا دەڵێت "بازدان بەسەر لێكگەیشتن و ڕێككەوتنەكاندا و هەوڵدان بۆ پێشێلكردنی مافە دەستوورییەكانی هەرێمی كوردستان، مامەڵەیەكی تەواو ناكۆكە لەگەڵ بەرپرسیاریەتیی نیشتمانیدا و جگە لە نائومێدی و ئاڵۆزكردنی سەقامگیریی دۆخی سیاسیی وڵات، هیچی دیكەی لێ ناكەوێتەوە و زیان بە تەواوی عێراق دەگەیەنێت".
دەقی ڕاگەیەندراوی سەرۆكی هەرێمی كوردستان:
بە نیگەرانییەكی قووڵەوە لە دەستكاری و گۆڕانكاری لەو بڕگانەی پرۆژەیاسای بودجەی عێراق دەڕوانین كە پەیوەندییان بە مافە دەستوورییەكانی هەرێمی كوردستانەوە هەیه و یەكجاری ڕەتیان دەكەینەوە. ئەم هەنگاوە دروستكردنی بەربەستە لەبەردەم پرۆژەیاسای بودجە كە هەموو عێراقییەكان بە ئومێدەوە چاویان لێیە بۆ ماوەی سێ ساڵی داهاتوو پەسەند بكرێت.
پابەندی بە ڕێككەوتنی سیاسیی هاوپەیمانیی بەڕێوەبردنی دەوڵەتەوە، بنەمای ئارامی و سەقامگیریی سیاسیی عێراق و هەنگاوی دروستە بەرەو داهاتوویەكی باشتر بۆ وڵات و تەواوی پێكهاتەكانی. بازدان بەسەر لێكگەیشتن و ڕێككەوتنەكاندا و هەوڵدان بۆ پێشێلكردنی مافە دەستوورییەكانی هەرێمی كوردستان، مامەڵەیەكی تەواو ناكۆكە لەگەڵ بەرپرسیاریەتیی نیشتمانیدا و جگە له نائومێدی و ئاڵۆزكردنی سەقامگیریی دۆخی سیاسیی وڵات، هیچی دیكەی لێناكەوێتەوە و زیان بە تەواوی عێراق دەگەیەنێت.
ڕابردوو و ئەزموونەكان سەلماندوویانە كە مامەڵەكردن بە لۆژیكی هێز و زۆرینە و كەمینه و پێشێلكردنی ماف و شایستەكانی پێكهاتەكانی عێراق، هیچ كاتێك ئارامی و سەقامگیری بۆ وڵات نەهێناوە و ناهێنێت، بۆیە داوا لە هەموو لایەك و بەتایبەتی لایەنەكانی هاوپەیمانیی بەڕێوەبردنی دەوڵەت دەكەین، پابەندی ڕێككەوتنەكان بن و هەموومان لە ئاستی بەرپرسیاریەتیدا ڕەفتار بكەین، لایەنە كوردستانییەكانیش دەبێ یەكڕیز و تەبا بەرگری لە مافە دەستوورییەكانمان بكەن.
دووپاتی دەكەینەوە كە هەرێمی كوردستان وەك هەمیشە لەسەر بنەمای دەستوور ئامادەی چارەسەركردنی هەموو كێشەكانە و ئەزموونی چەند مانگی ڕابردووی پێكەوەكاركردن و لێكگەیشتن و تەبایی لەنێوان هێز و لایەنە عێراقییەكاندا و كاركردن بە ڕێككەوتنی پێكهێنانی حكوومەتی فیدراڵی، مایەی خۆشحاڵیی گەلی عێراق و دۆستەكانی بوو، بۆیە دەبێ برەو بەو ئاراستەیە بدرێت و ڕێگە نەدرێت كەسانێك ببنە هۆی بەلاڕێدابردنی ڕێككەوتنەكان و ئاڵۆزكردنی دۆخەكە.
نێچیرڤان بارزانی
سەرۆكی هەرێمی كوردستان