پەرەگراف
بزووتنەوەی گۆڕان دەستپێشخەرییەكی بۆ چارەسەی كێشەی نێوان لایەنەكان سەبارەت بە پرسی هەڵبژاردن ڕاگەیاند و داوای كۆبوونەوەی لووتكەی پارتە سیاسییە سەرەكییەكان دەكات.
گۆڕان لە دەستپێشخەرییەكەیدا دەڵێت "بۆ ڕێگەگرتن لە بەردەوامیی ئەم دۆخە و لێكترازانی زیاتر، هەروەها ڕێگەنەدان بە پێشێلكردنی یاسا و بنەماكانی سازانی نیشتمانی، هیچ كۆبوونەوەیەكی كۆمسیۆن بە پێویست نازانین".
دەقی دەستپێشخەرییەكەی بزووتنەوەی گۆڕان:
پاش چەندین هەوڵی بزوتنەوەی گۆڕان بۆ هێوركردنەوەی دۆخی سیاسی هەرێمی كوردستان و چارەسەری ناكۆكییەكان لە ڕێگەی دامەزراوە فەرمیەكانەوە، جارێكی دیكە پرسی كاراكردنەوەی كۆمسیۆنی باڵای سەربەخۆی هەڵبژاردن و ڕاپرسی كوردستان لێكترازانێكی تری دروستكرد.
بزوتنەوەی گۆڕان لە (٣١-٣-٢٠٢١)دا پڕۆژەیەكی بۆ هەمواری یاسای هەڵبژاردنی پەرلەمانی كوردستان پێشكەشكرد. داوای كاراكردنەوەی كۆمسیۆنی كرد لە پێناوی هەڵبژاردنێكی پاك و بێگەرد لەكاتی یاسایی خۆیدا، بەڵام بۆ ئەم پرسە هیچ هەنگاوێكی پراكتیكی نەنرا. دواجار پێنج لایەنی سەرەكی لە (١١-٣-٢٠٢٣) ڕێكەوتنێكیان ئیمزاكرد كە ئەم دوپرسە ڕەهەندی نیشتمانییان هەیە و پێویستە بەسازان و هاوتەریب هەموار و كارا بكرێنەوە.
بزوتنەوەی گۆڕان سیاسەتی سەربەخۆی خۆی هەیە، كە پێداگرییە لە بنەما یاساییەكان و گەڕانەوەی شكۆ بۆ دامەزراوەكان، بۆ ڕێگەگرتن لەبەردەوامی ئەم دۆخە و لێكترازانی زیاتر، هەروەها ڕێگەنەدان بە پێشێلكردنی یاسا و بنەماكانی سازانی نیشتمانی هیچ كۆبونەوەیەكی كۆمسیۆن بەپێویست نازانین.
وەكو ئەركی نیشتمانی و سیاسی لەپێناو دۆزینەوەی دەرچەیەك بۆ چارەسەری ناكۆكیەكانی هەرێم و پێشهاتە نوێیكانی گۆڕەپانی سیاسی عێراق و دورخستنەوەی مەترسی لەسەر گوزەرانی خەڵك و پاراستنی قەوارەی هەرێم، بزوتنەوەی گۆڕان داوای كۆبونەوەی لوتكەی پارتە سیاسییە سەرەكیەكان دەكات.
بزوتنەوەی گۆڕان
٢٧ی ٥ی ٢٠٢٣