دەستگیركردن و مردنی كاسبكارەكەی هەولێر لە ماوەی چوار كاتژمێردا؛ یەكێتی: قبووڵ ناكرێت
پەرەگراف
تەرمی ئەو كاسبكارەی پاش چەند كاتژمێرێك لە دەستگیركردنی لەلایەن ئاسایشەوە لە هەولێر گیانی لەدەست دا، بە خاك سپێردرا. كەسوكاری گومانیان لە ڕووداوەكە هەیە و دەڵێن "زیرەك هیچ نەخۆشییەكی نەبووە". بەرپرسی مەڵبەندی یەكێتی لە هەولێر دەڵێت "زیرەك كادیر و كوڕی شەهیدی یەكێتییە. ئەو وەزعەی ڕووی دا، قبووڵ ناكرێت و سكاڵا تۆمار دەكەین".
نیوەڕۆی دوێنێ لە گەڕەكی سێتاقانی هەولێر، كاسبكارێك بە ناوی زیرەك عەلی محەمەد لەلایەن ئاسایشەوە دەستگیر كراوە و پاش چەند كاتژمێرێك كەسوكارەكەی ئاگادار كراونەتەوە كە بچن تەرمەكەی لە پزیشكی دادی وەربگرنەوە.
كەسوكاری ئەو كاسبكارە ڕەتیان كردەوە تەرمەكەی وەربگرنەوە و گومانیان لە ڕووداوەكە هەبوو، داوایان كرد تیمێك لە سلێمانییەوە بۆ پشكنین بچێتە هەولێر. ئەمڕۆ تیمەكە توێكاریی بۆ تەرمەكە كرد و پاشان لەلایەن كەسوكاریەوە بە خاك سپێدرا، بەڵام هێشتا ئەنجامی توێكارییەكە ئاشكرا نەكراوە.
یەكێك لە براكانی ئەو كاسبكارە سەبارەت بە ڕووداوەكە وتی "دەوروبەری نیوەڕۆی دوێنێ، ئاسایشی سەیداوە لەسەر كارەكەی زیرەكی دەستگیر كردووە، پێش كاتژمێر 4ی ئێوارە تەلەفۆنێكیان بۆ كردین كە تەرمەكەی لە پزیشكی دادییە".
كوڕ و براكانی ئەو كاسبكارە گومانیان لە ڕووداوەكە هەیە و دەڵێن "زیرەك هیچ نەخۆشییەكی نەبووە، چۆن دەبێت بە ساغی بیبەن و پاش چوار كاتژمێر بڵێن وەرن بۆ تەرمەكەی؟!".
سەبارەت بە هۆكاری دەستگیركردنی، برایەكی دەڵێت "شەوی ڕابردووتر لە كاتی هاتنەوەی بۆ ماڵ تووشی دەمەقاڵێیەك بووە لەگەڵ كەسێك كە نازانین كێیە، لەسەر ئەوە دوینێ دەستگیر كراوە".
كوڕەكەیشی دەڵێت "باوكم ماتۆڕێكی پێ بووە، كەسێك هاتووە وتوویەتی ماتۆڕەكەت لەو شوێنەدا لابە، لەسەر ئەوە دووسێ شەقیان لە یەكتر هەڵداوە"، ڕووداوەكە هەر ئەوەندە بووە.
بەڵام ئەمڕۆ بەرپرسی مەڵبەندی یەكێتی لە هەولێر هۆكاری دەستگیركردنی كاسبكارەكەی بۆ "زیادەڕۆیی" گەڕاندەوە و وتی "دەڵێن لە دووكانەكەی تۆزێك تەجاوزی هەبووە".
زیرەك عەلی محەمەد، لەدایكبووی 1983 بووە و خێزاندارە، دوو كوڕ و كچێكی هەیە. باوكی زیرەك شەهیدی یەكێتییەوە و بە قسەی بەرپرسی مەڵبەندی یەكێتی لە هەولێر، زیرەك خۆیشی كادیری یەكێتی بووە.
ئەمڕۆ مەجید محەمەد، بەرپرسی مەڵبەندی هەولێری یەكێتی، كۆنگرەیەكی ڕۆژنامەوانیی ئەنجام دا و وتی "ڕوونكردنەوەمان لە ئەنجوومەنی دادوەری و داواكاری گشتی و وەزارەتی ناوخۆ دەوێت بۆ دەرخستنی هۆكاری دەستگیركردن و مردنی ئەو كوڕە".
بەرپرسی مەڵبەندی هەولێری یەكێتی، پێی وایە زیرەك "یان بە لێدان یان بە تۆقاندان مردووە". دەشڵێت "ئەگەر جەڵتەش لێی دابێت لە ترسدا جەڵتە لێی داوە و هۆكارەكەی دەستگیركردنەكەی بووە".
"سكاڵامان ئامادە كردووە و تۆماری دەكەین، ئەگەر وەڵامێكی باوەڕپێهێنەرمان نەدەنەوە، ڕاناوەستین و ئەگەر كەیسەكە لە دادگای هەولێر یەكلا نەبێتەوە، لەوانەیە بیبەینە دادگای تەمیزی بەغداد"، مەجید محەمەد وای وت.
هەریەك لە كەسوكاری و یەكێتیش، پێیان وایە زیرەك چ لەسەر ڕووداوی "دەمەقاڵێ" و چ لەسەر "زیادەڕۆیی" دەستگیر كرابێت، دەبوو لەلایەن پۆلیسەوە دەستگیر بكرێت، چونكە ئەو كەیسانە پەیوەندییان بە پۆلیسەوە هەیە نەك ئاسایش، بۆ ئەوەش داوای لێكۆڵینەوە و ڕوونكردنەوە دەكەن.