ئاسایشی هەولێر: زیرەك هێرشی كردووەتە سەر كۆمپانیایەك و ویستوویەتی بەزۆر پارەیان لێ وەربگرێت
پەرەگراف
ئاسایشی هەولێر ڕاگەیەندراوێكی سەبارەت بە گیانلەدەستدانی كاسبكارەكەی هەولێر بڵاو كردەوە و ڕایدەگەیەنێت "زیرەك عەلی محەمەد هێرشی كردووەتە سەر كۆمپانیایەك و ویستوویەتی بەزۆر پارە لەو كۆمپانیایە وەربگرێت".
ئاسایشی هەولێر دەڵێت "دەستگیركردنی بە شێوەیەكی مەدەنییانە و بەبێ بەكارهێنانی هیچ توندوتیژییەك بووە، دواتر لە بەڕێوەبەرایەتیی ئاسایشی ناوشار-باشوور باری تەندروستیی تێك چووە و لە نەخۆشخانە گیانی لەدەست داوە".
بەڕێوەبەرایەتیی ئاسایشی هەولێر ئاماژەی بەوەش كردووە "لەسەر داوای خانەوادەی كۆچكردوو، تیمێكی پزیشكی دادی لە شاری سلێمانییەوە هاتن و بەشداربوون لە توێكاری و هۆكاری گیانلەدەستدانەكەی. لە دەرئەنجامی ڕاپۆرتی پزیشكی دادی، دەركەوت كە هاووڵاتی (زیرەك عەلی) بە هۆكاری (وەستانی دڵ/ الجلگە القلبیە) گیانی لەدەست داوە و هیچ ئاسەوارێكی لێدان و ئەشكنجەدان بەسەر لاشەكەیەوە نییە".
دەقی ڕاگەیەنراوی بەڕێوەبەرایەتیی ئاسایشی هەولێر:
دوای ئەوەی لە ڕۆژی ٥ی ٦یی ٢٠٢٣ ئاگادار كراینەوە كە هاووڵاتییەك بە ناوی (زیرەك عەلی محەمەد)، نیشتەجێی گەڕەكی (سێتاقان)، هێرشی كردۆتە سەر كۆمپانیایەك و ویستوویەتی بەزۆر پارە لەو كۆمپانیایە وەربگرێت، بۆیە بە پێویستمان زانیوە لە لامان ئامادە بكرێت.
لەم چوارچێوەیەدا، لە یەكێك لە بنكەكانی ئاسایشی ناوشار كە سەر بە بەڕێوەبەرایەتییەكەمانە، بە شێوەیەكی مەدەنییانە و بەبێ بەكارهێنانی هیچ توندوتیژییەك، لە ڕۆژی ٦ی ٦ی ٢٠٢٣ كەسی ناوبراو ئامادە كراوە، دوای لێكۆڵینەوەیەكی سەرەتایی، دەرفەتی ئەوەی پێ دراوە كە پەیوەندیی بە كەسوكاریەوە بكات تاوەكوو شوێنی زانراوبێت. دواتر لە بەڕێوەبەرایەتیی ئاسایشی ناوشارباشور، هاووڵاتی (زیرەك عەلی) باری تەندروستیی تێك چووە، دەست بەجێ لە لایەن تیمەكانمانەوە بەپەلە گواستراوەتەوە بۆ نەخۆشخانە، بەڵام گیانی لەدەست داوە، لە هەمان كاتدا خانەوادە بەڕێزەكەیان لە گیان لەدەستدانی كوڕەكەیان ئاگادار كراونەتەوە.
تەرمەكەی ڕەوانەی پزیشكی دادی هەولێر كراوە، دواتر لەسەر داوای خانەوادەی كۆچكردوو، تێمێكی پزیشكی دادی لە شاری سلێمانییەوە هاتن و بەشداربوون لە توێكاری و هۆكاری گیان لەدەستدانەكەی. لەدەرئەنجامی ڕاپۆرتی پزیشكی دادی، دەركەوت كە هاووڵاتی (زیرەك عەلی) بە هۆكاری (وەستانی دڵ/ الجلگە القلبیە) گیانی لەدەست داوە و هیچ ئاسەوارێكی لێدان و ئەشكنجەدان بەسەر لاشەكەیەوە نیە.
وێڕای ئەوەی ئێمە وەك بەڕێوەبەرایەتیی ئاسایشی هەولێر، ئامادەین هاوكاریی تەواوی خانەوادەی كۆچكرد و هەر لایەنێك و رێكخراوەكانی كۆمەڵگای مەدەنی بكەین، ئەگەر بیانەوێت بەشداریی پرۆسەی ئەنجامی لێكۆڵینەوەكان بكەن، لە چۆنیەتیی گیان لەدەستدانی كۆچكردوو.
بەڵام بەداخەوە چەند كەناڵێكی ڕاگەیاندن و لایەنێك، دەیانەوێت كەیسی گیان لەدەستدانی ئەم هاووڵاتییە بۆ مەرامی تایبەتیی خۆیان بەكار بهێنن و تۆمەتی بێ بنەما و دوور لە ڕاستی بڵاو دەكەنەوە، بەبێ ئەوەی ڕاستی و درووستیی ڕووداوەكان وەك خۆی بزانن.
لێرەوە داوا لە سەرجەم حزب و لایەنە سیاسییەكان دەكەین، بەبێ بوونی زانیاری هیچ زانیاریەكی نادروست لەپێناو بەرژەوەندی تەسكی حزبایەتی بلاو نەكەنەوە و پێش پرۆسەی ئەنجامی لێكۆڵینەوەكان نەكەون و هەرداواكاری یەكیان هەیە بەرێگای داداگاوە ئەتوانن پێشكەشی بكەن و بەرگری نەكەن لە ئەندامەكانیان كە كارێكی نایاسایی ئەنجام دەدەن، چونكە ئارامی و ئاسایشی شاری هەولێر ئەركی سەرشانی هەموو لایەكمانە، بە پێچەوانەوە هەر كەسێك كارێكی نایاسایی ئەنجام بدات، بە ئەركی سەرشانی خۆمانی دەزانین ڕووبەڕووی یاسای بكەینەوە.
بۆیە ئێمە لە بەڕێوەبەرایەتیی ئاسایشی هەولێر، دووپاتی دەكەینەوە كە هیچ جۆرە شێوازیك لەم تۆمەتە بێ بنەمایانەی كە بۆ مەرامی تایبەت ئاراستەمان دەكرێن، لە ئەركی خۆمان ساردمان ناكاتەوە، بەڵكوو بە پێچەوانەوە مكوڕترمان دەكات لە جێبەجێ كردنی ئەركەكانمان، چونكە پارێزگاریكردن لە سەروماڵی هاووڵاتیان و دانیشتوانی بەڕێزی شاری هەولێر و دەوروبەری، بە ئەركی سەرشانی خۆمان دەزانین، لەم پێناوەشدا بەبێ هیچ جیاوازییەك یاسا لەسەر هەموو تاكێكی كۆمەڵگەدا جێبەجێ دەكرێت و هیچ كەسێكیش لە سەرووی یاساوە نییە.
بەڕێوەبەرایەتیی ئاسایشی هەولێر
٧ی ٦ی ٢٠٢