وەزیری تەندروستی: لە عێراق ٦٩ و لە هەرێم پێنج تووشبووی تای خوێنبەربوون گیانیان لەدەست داوە
پەرەگراف
وەزیری تەندروستیی هەرێمی كوردستان ڕایگەیاند "لە عێراقدا ٢٦٥ حاڵەتی پشتڕاستكراوەی تووشبوون بە تای خوێنبەربوون و لە هەرێم ١١ حاڵەت تۆمار كراون، لە عێراق ٦٩ تووشبوو و لە هەرێم پێنج تووشبوو گیانیان لەدەست داوە".
دكتۆر سامان بەرزنجی، وەزیری تەندروستیی هەرێمی كوردستان، لە كۆنگرەیەكی ڕۆژنامەوانیدا زانیاری و ئامارەكانی سەبارەت بە پەتا مەترسدارەكە خستە ڕوو و وتی، تا 25ی ئەم مانگە لەسەر ئاستی عێراق 865 حاڵەتی گومانلێكراو و لە هەرێمی كوردستان 23 حاڵەتی گومانلێكراوی پەتاكە هەبوون.
دكتۆر سامان بەرزنجی ئاماژەی بەوە كرد كە نەخۆشیی تای خوێنەبەربوون لە ساڵی 1947ـەوە هەیە، بە تایبەت لە وڵاتانی ڕۆژهەڵاتی ناوەڕاست و باشووری ئاسیا زیاتر بڵاوە. مەترسیدرە، لەبەر ئەوەی ڕێژەی مردن تێیدا لەسەدا 50 بۆ لەسەدای 60ی تووشبووانە.
دوێنێش وەزارەتی تەندروستیی هەرێمی كوردستان لەپێناو كۆنترۆڵكردنی پەتای (تای خوێنبەربوون)، ژمارەیەك ڕێوشێنی بۆ سەربڕینی ئاژەڵ و قوربانیكردن ڕاگەیاند و دەڵێت "سەربڕینی ئاژەڵ لە ماڵان بە هەموو شێوەیەك قەدەغەیە و پێویستە هاووڵاتیانیش گۆشتی سوور لە شوێنی ڕێپێدراو بكڕن".
وەزارەتی تەندروستی لە نۆ خاڵدا ڕێنمایی هاووڵاتیان و قەسابەكان دەكات كە "سەربڕینی ئاژەڵ تەنیا لە شوێنی ڕێپێدراو بێت، لەبەركردنی جلوبەرگی تایبەت و دەستكێش لە كاتی مامەڵە و سەربڕینی ئاژەڵ و دواتر پاككردنەوەی شوێنەكەی بە گیراوەی تایبەت".