ئێران لە پلانی پێدانی سیستمی بەرگریی ئاسمانی بە پێشمەرگە نیگەرانە و داوای ڕوونكردنەوە دەكات
پەرەگراف
ئێران داوای ڕوونكردنەوە لە هەرێمی كوردستان دەكات لەبارەی هەوڵی جێگیركردنی سیستمی بەرگریی ئاسمانی لەلایەن ئەمەریكاوە لە هەرێمی كوردستان، ئەوەش دوای ئەوەی ژمارەیەك كۆنگرێسمانی ئەمەریكی پشتگیری لە پڕۆژەیەك دەكەن كە وڵاتەكەیان سیستمی دژە مووشەك بە هەرێمی كوردستان بدات.
ناسر كەنعانی، وتەبێژی وەزارەتی دەرەوەی ئێران، ئەمڕۆ لە كۆنگرەیەكی ڕۆژنامەوانیدا لە وەڵامی ئەگەری پێدانی سیستمی بەرگریی ئاسمانی لەلایەن ئەمریكاوە بە هێزەكانی پێشمەرگەی هەرێمی كوردستان وتی "سەرنج و جەختی تاران لەسەر بەرپرسیارێتیی حكومەتی ناوەندیی عێراقە و دەبێت بەرپرسانی هەرێمی كوردستانیش لەو بارەوەیەوە ڕوونكردنەوە بدەن".
كەنعانی وتیشی"بەرپرسانی هەرێمی كوردستان دەبێت ئاگاداری بەرپرسیارێتیی خۆیان و هەستیاربوونی كارەكانیان بن، پەیوەست بە ئاسایشی سنوور و ڕەچاوكردنی سیاسەتی دراوسێیەتی".
وتەبێژەكەی وەزارەتی دەرەوەی ئێران جەختی كردەوە كە وڵاتەكەی هیچ كات متمانەی بە ڕوانگە و كردەوەكانی ئەمەریكا نییە و پێی وایە واشنتن بەرژەوەندیی خۆی لە ناسەقامگیركردنی وڵاتانی ناوچەكەدا دەبینێت.
ئەو هەڵوێستەی وەزارەتی دەرەوەی ئێران دوای ئەوە دێت كە كۆنگرێسی ئەمەریكا لە پڕۆژە بوودجەی وەزارەتی بەرگریی وڵاتەكەیدا، بڕگەیەكی زیاد كردووە كە تایبەتە بە دابینكردنی سیستمی دژەمووشەكی بۆ هێزەكانی پێشمەرگە لە هەرێمی كوردستان.
پڕۆژەی پێدانی سیستمی بەرگریی ئاسمانی بە هەرێم، لەلایەن دۆن بەیكن، كۆنگرێسمانی كۆمارییەكان پێشكەش كراوە. ئەو كۆنگرێسمانە بە پێگەی میدڵ ئیست ئای وتووە "ڕێوشوێنەكان لەلایەن هەردوو پارتی كۆماری و دیموكراتەكانەوە پشتیوانییەكی بەهێزی لێ كراوە و داوا لە ئیدارەی ئەمەریكا دەكەین كاری ڕاهێنان و پێدانی سیستمی بەرگریی ئاسمانی بە هێزەكانی پێشمەرگە ئەنجام بدات، بۆ بەرگریكردن لە هێرشە مووشەكییەكان".
خاكی هەرێمی كوردستان بەردەوام لەلایەن ئێران و توركیاوە بە پاساوی لێدان لە حیزب و لایەنە ئۆپۆزسیۆنەكان، ڕووبەڕووی هێرشی ئاسمانی بووەتەوە.
سوپای پاسدارانی ئێران لە مانگەكانی كۆتایی 2022ـدا هێرشەكانی چڕ كردەوە و چەند جارێك بارەگای حیزبەكانی ڕۆژهەڵاتی لە قووڵایی خاكی هەرێمدا بە مووشەكی بالیستی و درۆنی بۆمبڕێژكراو كردە ئامانج.
هەوڵەكان بۆ پێدانی سیستمی دژەمووشەك و بەهێزكردنی توانای بەرگریی ئاسمانیی هەرێمی كوردستان، هاوكاتە لەگەڵ فشارە بەردەوامەكانی ئەمەریكا و هاوپەیمانان بۆ سەر پارتی و یەكێتی تا دەستبەرداری هێزی پێشمەرگە ببن و بكرێتە هێزێكی نیشتمانی، لەو چوارچێوەیەشدا چاودێریی پڕۆسەیەكی یەكخستنەوە و چاكسازی دەكەن لە وەزارەتی پێشمەرگە كە چەند ساڵێكە بەردەوامە، بەڵام بەهۆی دەستوەردانی یەكێتی و پارتییەوە، بەردەوام لەمپەری بۆ دروست بووە و چەند جارێكیش هاوپەیمانان لەوبارەیەوە هۆشدارییان داوەتە بەرپرسانی هەرێم.
هاوكات لەگەڵ ئەو پڕۆسەیەدا، ئەمەریكا مانگانە هاوكاریی دارایی پێشكەش دەكات و مووچەی بەشێك لە هێزەكانی پێشمەرگە دابین دەكات، مانگی ٩ی ساڵی ڕابردووش وەزارەتی پێشمەرگە و وەزارەتی بەرگریی ئەمەریكا یاداشتێكی لێكتێگەیشتیان واژوو كرد، بەپێی یاداشتەكە ئەمەریكییەكان بەردەوام دەبن لە هاوكاریكردن و پڕكردنەوەی پێداویستی و كەموكووڕییەكانی هێزی پێشمەرگە.