یەكێتی: پارتی بووە بە دوو باڵ، پارتی: لە دز وایە هەموو كەس دزە

12-05-2020 05:38

پەرەگراف

گرژییەكانی نێوان پارتی‌و یەكێتی بەردەوامەو بەرپرسانی ئەو دوو حیزبە لە میدیاكانەوە ڕەخنە لە یەك دەگرن‌و وەڵامی یەكتر دەدەنەوەو هێشتا ئامادەنین وادەی كۆبوونەوەیەك دیاریی بكەن‌و كێشەكانی نێوانیان بخەنەسەر مێزی گفتوگۆ.

ناكۆكییەكانی نێوان ئەو دوو حیزبە زیاتر لە دوای كۆنگرەی یەكێتی‌و دەستبەكاربوونی سەركردایەتی نوێی ئەو حیزبە دروست بوو، سكرتێری ئەنجومەنی سەركردایەتی یەكێتی دەڵێت، ئەوان كێشەكانی ناوخۆیان چارەسەر كردووە، بەڵام ئێستا كێشەیان ئەوەیە مامەڵە لەگەڵ لایەنێكدا دەكەن كە "هەمان نەخۆشی پێشتری ئێمەی هەیە".

فەرید ئەسەسەرد بۆ دەنگی ئەمریكا دەشڵێت "تێڕوانینی ئێمە وایە ئێستا پارتی دیموكراتی كوردستان بووەتە دوو باڵ هەموو جارێك كە باسیشیان دەكەین دەڵێین ئەوان وەكو ئێمەیان لێهاتووە لە پێش كۆنگرەی چوارەم، ئەو كێشانەی كە لەناو ئەواندا هەیە ئێمە توانیمان لە كۆنگرەی چوارەمدا چارەسەریان بكەین... بەڵام نەخۆشیەكەی پێشتری ئێمە گواستراوەتەوە بۆ ناو پارتی هیوادارین ئێمە چۆن توانیمان چارەسەری بكەین ئەوانیش بەو شێوەیەی كە بەگونجاوی دەزانن چارەسەری بكەن".

ئەسەسەرد ئاماژە بەوەش دەكات، پێیان باشە دۆستایەتی هەردوو گروپەكەی ناو پارتی بكەن، بەڵام هەست دەكەن گروپێكیان لەگەڵ سەركردایەتی نوێی یەكێتی ناگونجێت.

ئەو لێدوانانەی بەرپرسەكەی یەكێتی بێ كاردانەوە نەمایەوە لە لایەن پارتییەوەو هەر ئەمڕۆ لە ئاستێكی باڵادا وەڵام درایەوە، ئەوەش لەكاتێكدایە نێوانی ئەو دوو حیزبە بە دۆخێكی گرژیی‌و ئاڵۆزییدا تێدەپەڕێت‌و كۆبوونەوەی چاوەڕوانكراوی نێوان هەردوو حیزب لە بارەی كێشەكانی نێوانیان بۆ كاتێكی نادیار دواخراوە.

"مەسەلەیەكی كوردی هەیە دەڵێت (لەلای دز وایە هەموو كەسێك دزە)، هەموو كەسێك دز نییە و هەموو حیزبێكیش باڵی تێدا نییە، لەناو هەندێك حیزبیش باڵ باڵێن هەیە" ئەمە وەڵامی فازڵ میرانی سكرتێری مەكتەبی سیاسی پارتی بوو.

میرانی بە ڕۆژنامەنووسانی وت "ئێمە گرووپ گرووپ نین، بەڵكو یەك گرووپین، یەك پارتین و یەك سەرۆكمان هەیە، ئەویش مەسعود بارزانییە، نوقتە سەری دێڕ. كەسیش لە ئێمە باڵی پێوە نییە، ئەگەر باڵیان هەبوایە ئێستا فڕیبوون وەكو خەڵكێكی دیكە، سوپاس بۆ خودا نە باڵمان هەیە نە دەفڕین".

لەگەڵ بەردەوامیی ناكۆكییەكانی نێوان پارتی‌و یەكێتی، دوێنێ لە سلێمانی نێچیرڤان بارزانی سەرۆكی هەرێم‌و جێگری سەرۆكی پارتی سەردانی بەرهەم ساڵح سەرۆك كۆماری عێراق ئەندامی سەركردایەتی یەكێتی كرد، بەشێك لە كۆبوونەوەكەیان باسكردنی كێشە ناوخۆییەكانی هەرێم بووە.

لەبارەی ئەو كۆبوونەوەیەوە فازڵ میرانی دەڵێت "بە دڵنیاییەوە ئەو دوو سەرۆكە كاریگەرییان لەسەر حیزبەكانیان دەبێت بۆ ئەوەی پەیوەندی نێوانیان ئاسایی بكەنەوە. دواتر پەیوەندی نێوان ئێمە و یەكێتی بەو خراپییە نییە كە خەڵكانێك دەیانەوێت. خەڵكانێك هەن بە گشتی دووژمنی جوڵانەوەی كوردن، نەك دووژمنی ئێمەبن بە تەنیا یان یەكێتی یان حیزبێكی دیكە، بەڵكو دووژمنی هەموو كوردێكن".