دەستەی گەشتوگوزار: لە شەش ڕۆژدا نزیكەی ٧٠٠ هەزار گەشتیار ڕوویان لە ناوچە گەشتیارییەكان كردووە
پەرەگراف
دەستەی گەشتوگوزاری هەرێم دەڵێت: لە ماوەی شەش ڕۆژدا نزیكەی ٧٠٠ هەزار گەشتیار و سەردانیكار ڕوویان لە ناوچە گەشتیارییەكانی هەرێمی كوردستان كردووە.
بەپێی ڕاگەیەنداوی دەستەكە، لە ماوەی 26 - 6 تاكوو 1-7-2023، تۆماركردنی ژمارەی گەشتیار و سەردانیكار لە شوێنە گەشتیارییەكانی هەرێمی كوردستان گەیشتووەتە 689 هەزار و 889 كەس.
ئەو گەشتیارانە بەشێكیان هی ناوخۆی هەرێمی كوردستان بوون و بەشێكی دیكە لە پارێزگاكانی باشوور و ناوەڕاستی عێراق و هەندێكیش لە دەرەوەی عێراقەوە هاتوون.
دەستەی گەشتوگوزار ئاماژە بەوە دەكات كە "بە هەماهەنگی لەگەڵ لایەنە پەیوەندیدارەكانی حكومەتی هەرێم و كەرتی تایبەت، بە شێوەیەكی شارستانییانە ئامادەكاری تەواو بۆ پێشوازیكردن لە گەشتیاران كرا".
وەكوو دەستەكە لە ڕاگەیەندراوەكەیدا ئاماژەی پێ داوە، "هیچ ڕووداوێكی نەخوازراو ڕووی نەداوە" و جەخت لەوەش دەكاتەوە كە "پلانی پێشوازیكردن لە گەشتیاران بە شێوەیەكی سەركەوتووانە و بێ كەموكووڕی جێبەجێ كرا".
"دەستەی گەشتوگوزار لەگەڵ كاركردن بۆ زیادكردنی ژمارەی گەشتیاران، هاوكات لە ڕووی چۆنایەتیشەوە هەنگاوی ناوە بە ئاڕاستەی زیادكردنی شەومانەوەی گەشتیاران، لە ڕێگەی هەمەجۆركردنی چالاكییە گەشتیارییەكان و پەرەپێدانی جۆرەكانی گەشتوگوزار"، دەستەی گەشتوگوزار وا دەڵێت.