هەولێر ڕووبەڕووی وشكەساڵی دەبێتەوە؛ سێ دەریاچە دروست دەكرێن و شاندێكیش دەچێتە سعودیە
پەرەگراف
پاش تەرخانكردنی بودجەی تەنگەتاوی بۆ دەربازبوون لە سێ مانگی هاوین، بڕیاریشە سێ دەریاچە لە هەولێر دروست بكرێن، ئەوەش لە چوارچێوەی چڕكردنەوەی هەوڵەكان بۆ ڕووبەڕووبوونەوەی وشكەساڵی كە چەند ساڵێكە پارێزگاكە بەدەستیەوە گیرۆدە بووە. ئەمڕۆیش شاندێك بە سەرۆكایەتی پارێزگاری هەولێر بۆ "سوودوەرگرتن لە ئەزموونی ئەو وڵاتە و چارەسەركردنی كێشەی ئاوی خواردنەوە" سەردانی سعودیە دەكات.
هەژماری فەرمیی پارێزگای هەولێر لە تۆڕی كۆمەڵایەتیی فەیسبووك دەڵێت "پڕۆژەی دروستكردنی سێ دەریاچە كاری لەسەر دەكرێت، پڕۆژەكە دەرخستە و هەموو ئامادەكارییەكی بۆ كراوە و ڕەوانەی سەرۆكایەتیی ئەنجوومەنی وەزیران كراوە بۆ پێداچوونەوە و بڕیار لەسەردان".
دروستكردنی ئەو سێ دەریاچە، لە پلانی ساڵانی ڕابردووی پارێزگای هەولێردا هەبووە، بەڵام دواكەوتووە. پڕۆژەكە دروستكردنی سێ دەریاچەی گەورەیە و بڕیارە ئاوی لە زێی گەورە یان لە بەستۆڕە بۆ دابین بكرێت. پارێزگای هەولێر دەڵێت "جێبەجێكردنی پڕۆژەكە كاریگەریی زۆری لەسەر شاری هەولێر دەبێت".
"بێجگە لەو پڕۆژەیە، حكومەتی هەرێمی كوردستان بڕیاری داوە زیاتر لە 20 پۆند لە سنووری پارێزگای هەولێر جێبەجێ بكات و لەوانەش 21 پۆند بڕیاریان بۆ دەرچووە، حەوت پۆندی دیكەش پەسەند كراون و دەچنە بواری جێبەجێكردنەوە"، پارێزگاری هەولێر وا دەڵێت.
هەر دوێنێش 3-7-2023، بودجەی تەنگەتاوی بۆ دەربازبوون لە سێ مانگی هاوینی ئەمساڵ لە هەولێر تەرخان كرا و بڕەكەی شەش ملیار دینارە، پێشتریش ١٤ ملیاری دیكە بۆ چارەسەری گرفتەكانی كەمئاوی لەو پارێزگایە تەرخان كرا.
ڕاگەیاندنی پارێزگای هەولێر بڵاوی كردەوە كە لەسەر فەرمانی سەرۆكی حكومەت و لە چوارچێوەی چارەسەركردنی كێشەكانی وشكەساڵی و گرفتی كەمئاوی لە سنووری پارێزگای هەولێر، ڕەزامەندی دراوە بە تەرخانكردن و خەرجكردنی گوژمەی 20 ملیار دینار بۆ چارەسەركردنی گرفتی كەمئاوی.
هاوكات بڕیارە ئەمڕۆ 4-7-2023، شاندێكی پارێزگای هەولێر بە سەرۆكایەتیی ئومێد خۆشناو، پارێزگاری هەولێر و ئەندامێتی جێگری پارێزگار و بەڕێوەبەری گشتیی ئاو و ئاوەڕۆی هەرێمی كوردستان و بەڕێوەبەری ئاو و ئاوەڕۆی هەولێر و ژماریەكی تر لە وەبەرهێنەر و پیاوانی كار، سەردانی شانشینی عەرەبیی سعودیە بكەن.
لەو سەردانەدا لەگەڵ وەزیری بازرگانی، وەزیری وەبەرهێنان، ئەمیری ڕیاز و نوێنەرانی كۆمپانیا سعودییەكان كۆدەبنەوە. ڕاگەیاندنی پارێزگای هەولێر ئامانجی سەردانەكەی بە "ئاڵوگۆڕی بازرگانی، وەبەرهێنان و چارەسەركردنی كێشەی ئاوی خواردنەوەی هەولێر و سوودوەرگرتن لە ئەزموونی وڵاتەكە" ناو بردووە.
"شاندەكەی پارێزگای هەولێر چوار رۆژ لە سعودیە دەمێننەوە و هانی كۆمپانیا سعودییەكان دەدەن بۆ ئەوەی وەبەرهێنان بێنە هەولێر و هەرێمی كوردستان".
ساڵانە لە هاویندا كێشەی گەورە بەرۆكی هەولێر دەگرێت بۆ دابینكردنی ئاوی ماڵان، بۆ دەربازبوون لە گرفتەكانی ئاو و وشكەساڵیی بودجەی تایبەت تەرخان دەكرێت و حكومەت نەیتوانیوە چارەسەری ڕیشەیی بكات.
"بڕیار دراوە بە تەرخانكردن و خەرجكردنی بڕی (6 ملیار دینار) وەكوو بودجەی تەنگەتاوی بۆ دەربازبوون لە سێ مانگی هاوینی ئەمساڵ بۆ مانگەكانی (7،8، 9) و بۆ هەر مانگێك (2 ملیار دینار)" پارێزگای هەولێر وا دەڵێت.
هاوكات پارێزگای هەولێر لە ئاگاداریەكدا داوا دەكات؛ هەر هاوڵاتییەك لە سنووری هەر شەش بەڕێوەبەرایەتیی شارەوانییەكەی هەولێر گرفت و كێشەی كەمیی ئاوی هەبێت، بۆ چارەسەركردنی دەتوانێت ڕۆژانە لە كاتژمێر (8)ی بەیانی تاكو كاتژمێر (10)ی شەو پەیوەندی بەو ژمارە تەلەفۆنانەوە بكات:-
سنووری شارەوانيی یەک
07515250001
07515260001
سنووری شارەوانيی دوو
07515250002
07515260002
سنووری شارەوانيی سێ
07515250003
07515260003
سنووری شارەوانيی چوار
07515250004
07515260004
سنووری شارەوانيی پێنج
07515250005
07515260005
سنووری شارەوانيی شەش
07515250006
07515260006