داواكاری گشتی: سەرۆك و ئەنجوومەنی سەندیكا و ڕێكخراو و یەكێتییە پیشەییە ماوەبەسەرچووەكان سڕ بكرێن
پەرەگراف
سەرۆكی داواكاری گشتیی هەرێم پێشنیاری سڕكردنی "سەرۆك و ئەنجوومەنی سەندیكا و ڕێكخراو و یەكێتییە پیشەییەكان" دەكات و دەڵێت "زۆربەیان ماوەیان بەسەر چووە و پێگەكەیان بۆ مەرامی كەسی بەكار دەهێنن".
كاوە فەتحی مەعسووم، سەرۆكی داواكاری گشتیی هەرێم، لە نووسراوێكدا كە ئاراستەی سەرۆكایەتیی دیوانی ئەنجوومەنی وەزیرانی هەرێمی كردووە، دەڵێت "لە ئەنجامی بەدواداچوونمان بۆ كار و چالاكییەكانی سەندیكا و یەكێتییە پیشەییەكان، بۆمان دەركەوت كەوا زۆربەیان ساڵانێكی زۆرە كۆنگرەیان ئەنجام نەداوە و ئەنجوومەن و سەرۆكەكانیان بەدەر لە یاسا بەردەوامن لە كارەكانیان".
سەرۆكی داواكاری گشتیی هەرێم بەردەوامیی ئەو سەرۆك و ئەنجوومەنانە بە "سەرپێچییەكی زەقی یاسا و پەیڕەو و پرۆگرامی سەندیكا و یەكێتییەكان" ناو دەبات و دەشڵێت "بڕیارەكانیان پووچەڵە، لەبەر ئەوەی بەپێی یاسا، ئەمانە بۆ ماوەیەكی دیاریكراو هەڵبژێردراون، دوای ئەو ماوەیە هیچ شەرعییەتێكی یاساییان نامێنێت".
سەرۆكی داواكاری گشتی ئەو سەرۆك و ئەنجوومەنە ماوە بەسەرچووانە تۆمەتبار دەكات بەوەی كە "پێگەی خۆیان بۆ مەرامی كەسی و سوودوەرگرتنی كەسی بەكار دەهێنن، لەبەر ئەوەی ناكەونە ژێر باری هیچ چاودێرییەك".
"پێشنیار دەكەین بە سڕكردنی سەرۆك و ئەنجوومەنی ئەو سەدیكا و ڕێكخراو و یەكێتییانەی كە ماوەی یاساییان بەسەر چووە و كۆنگرەیان ئەنجام نەداوە، بۆ هەڵبژاردنی سەرۆك و ئەنجوومەنێكی نوێ"، سەرۆكی داواكاری گشتیی هەرێم وا دەڵێت.