پەرەگراف
كۆمپانیا بیانییەكانی بواری نەوت لە هەرێمی كوردستان، هۆشداری لەبارەی مەترسییەكانی بەردەوامیی ڕاگرتنی هەناردەی نەوت دەدەن و دەڵێن "هەزاران كەس بێكار بوون و هەڕەشە لە هەزاران كەسی دیكە دەكات".
كۆمەڵەی پیشەسازیی نەوت لە هەرێمی كوردستان (APIKUR) كە لە كۆمپانیاكانی دی ئێن ئۆ، گەنەل ئینێرجی، گۆڵف كیستۆن و ئێچ كەی ئێنی بواری نەوت پێك دێت، لە ڕاگەیەندراوێكدا دەڵێت "بەردەوامیی ڕاگرتنی هەناردەكردنی نەوتی هەرێمی كوردستان، كاریگەریی بەرچاوی لەسەر وەبەرهێنانی بیانی لە كوردستان دەبێت".
ئەو كۆمپانیا بیانییانەی بواری نەوت، ڕاگرتنی هەناردەی نەوتی هەرێم بە "هەڕەشە لەسەر هەزاران كەس" ناو دەبەن و ئاشكرای دەكەن كە كۆمەڵەكەیان "لە ساڵی 2023دا بە بڕی 400 ملیۆن دۆلار خەرجییەكانی لە هەرێمی كوردستان كەم كردووەتەوە".
"لە كاتێكدا كە نازانرێت چ كاتێك هەناردەكردنی نەوتی هەرێمی كوردستان دەست پێ دەكاتەوە و چ كاتێك خەرجییەكانی هەناردەی نەوت خەرج دەكرێت، كۆمپانیا ئەندامەكان ناچار بوون كە خەرجییەكانیان كەم بكەنەوە، ئەمەش بووەتە هۆی ئەوەی هەزاران كەس بێكار ببن"، كۆمەڵەكە وا دەڵێت.
هەروەها لە ڕاگەیەندراوەكەیاندا هۆشدارییان داوە ئەگەر بێتو ڕاگرتنی هەناردەی نەوتی هەرێمی كوردستان بەم شێوەیە بەردەوام بێت، وەبەرهێنانی بیانی "كەمتر" دەبێتەوە و لە بەرامبەردا "مەترسی لەسەر چەندین كەسی دیكە دروست دەكات". هەر بۆ یە داوای لە هەموو لایەنەكان كردووە كە بەردەوام بن لە هەوڵەكانیان بۆ چارەسەری خێرای كێشەكان.