كونسوڵخانەی ئەمریكا: نیگەرانین دەربارەی پاشەكشەی ئازادیی ڕاگەیاندن لە هەرێمی كوردستان
پەرەگراف
كونسوڵخانەی ئەمریكا لە هەولێر، جەخت لەسەر نیگەرانیی خۆی دەربارەی "پاشەكشەی ئازادیی ڕاگەیاندن" لە هەرێمی كوردستان دەكاتەوە.
مارك سترۆ، كونسوڵی گشتیی كونسوڵخانەی ئەمریكا لە هەولێر، لەگەڵ ڕۆژنامەوانانی ژمارەیەك ناوەندی ڕاگەیاندنی سەربەخۆ كە ڕۆژنامەنووس لارە فەخرەدین، نوێنەری پەرەگرافیشیان تێدا بوو، كۆبووەوە.
كونسوڵخانەی ئەمریكا دەڵێت "كۆبوونەوەكە بۆ ئاشنابوون بە كارەكانیان و پانتایی كاری ڕاگەیاندن و ئەو ئاڵنگارییانەی ڕووبەڕووی ڕاگەیاندنی سەربەخۆ دەبنەوە"، بووە.
كونسوڵخانەی ئەمریكا دوای كۆبوونەوەكە ڕایگەیاند "بەردەوامین لە نیگەرانیەكانمان دەربارەی پاشەكشەی ئەم دواییانەی ئازادیی ڕاگەیاندن، پاشەكشە لە نموونەی دەستبەسەركردنی هەڕەمەكیانە و پشكنینی نایاسایی ئامێری ئەلیكترۆنی و كەموكووڕی لە جێبەجێكردنی یاسای كاری ڕاگەیاندن و یاسای مافی بەدەستهێنانی زانیاریی هەرێمی كوردستان".
هەروەها دەستخۆشیشی لە ڕۆژنامەوانەكان كردووە لە "بەرامبەر هەوڵە بەردەوامەكانیان بۆ ڕووماڵكردنی بێلایەنانەی هەواڵە سیاسی و ئابووری و كۆمەڵایەتییەكانی هەرێم".
كۆبوونەوەی ڕۆژنامەنووسانی میدیا سەربەخۆكان لەگەڵ كونسوڵی ئەمریكا لە هەولێر، هەوڵ و هەنگاوێكی دیكەیە بۆ پاڵپشتیی وڵاتان لە ئازادیی كاری میدیایی، بە تایبەت كە پێشێلكارییەكان لەم ساڵانەی دواییدا بەرانبەر ڕۆژنامەنووس و میدیاكان لە هەڵكشاندایە.
كارنەكردن بە یاسای كاری ڕۆژنامەوانی و یاسای مافی بەدەستهێنانی زانیاری، لەمپەرێكی دیكەی بەردەم كاری ڕۆژنامەوانییە، بە تایبەتیش هەڵاواردن لە نێوان میدیاكان دەكرێت بۆ پێدانی زانیاری.