ئاژانسی ڕۆژنیوز تۆمەتەكانی ئاسایشی دهۆك دەربارەی ڕۆژنامەنووس سلێمان ئەحمەد ڕەت دەكاتەوە
پەرەگراف
ئاسایشی دهۆك ڕۆژنامەنووسێكی ئاژانسی ڕۆژنیوز دەستگیر دەكات و بە "كاری نهێنی و نایاسایی بۆ پەكەكە" تۆمەتباری دەكات. ئاژانسی هەواڵی ڕۆژنیوز و كۆمپانیای چەتر لە بەیاننامەیەكی هاوبەشدا تۆمەتەكان "ڕەت" دەكەنەوە و دەڵێن "سلێمان یونس بۆ بەشداریكردن لە پرسەی باوكی بە شێوەیەكی فەرمی چووبووە ڕۆژئاوای كوردستان و لە كاتی گەڕانەوەی لەلایەن پارتییەوە ڕفێندراوە".
ئاژانسی هەواڵی ڕۆژنیوز و كۆمپانیای چەتر دەڵێن "ماوەی یەك هەفتەیە سلێمان ئەحمەد، ڕۆژنامەنووس و هەواڵسازی بەشی عەرەبی ئاژانسەكەمان (ڕۆژنیوز)، لەلایەن پارتی دیموكراتی كوردستان-پەدەكەوە ڕفێندراوە و تا ئێستا بێسەروشوێنە، شەوی ڕابردووش ئاسایشی دهۆك دانیان بەوەدا نا كە ئەوان ڕفاندوویانە".
بەپێی بەیاننامەكە، ئەو ڕۆژنامەنووسە لە ١ـی تشرینی یەكەم "بۆ بەشداریكردن لە پرسەی باوكیان و سەردانیكردنی خێزانەكەی، بەشێوەیەكی فەرمی چووبووە ڕۆژئاوای كوردستان"، بەڵام دوای گەڕانەوەی بۆ هەرێمی كوردستان لە دەروازەی فیشخابوورەوە، لەلاەین ئاسایشەوە دەستگیر كراوە "بەبێ ئەوەی هیچ هۆكارێكی یاساییان هەبێت و هیچ ڕوونكردنەوەیەك بدەن".
لەبارەی ئەو ڕۆژنامەنووسەوە، شەوی ڕابردوو ئاسایشی دهۆك ڕاگەیەندراوێكی بڵاو كردەوە و ڕەتی كردەوە دەستگیركردنی پەیوەندیی بە كاری ڕۆژنامەنووسییەوە هەبێت و دەڵێت "هێزەكانی ئاسایش كادیرێكی پەكەكەیان بە ناوی (سلێمان ئەحمەد) دەستگیر كرد كە نابراو بۆ كاری نهێنی و نایاسایی بۆ پەكەكە هاتووچۆی كردووە، بۆیە ڕاگیراوە".
ئاسایشی دهۆك دەشڵێت "سلێمان ئەحمەد لە لێكۆڵینەوەكەدا دانی بە كارەكانی خۆیدا ناوە، بۆیە ڕووبەڕووی دادگا دەكرێتەوە و بەپێی یاسا مامەڵەی لەگەڵ دەكرێت".
ئاژانسی هەواڵی ڕۆژنیوز و كۆمپانیای چەتر، ڕاگەیەندراوەكەی ئاسایشی دهۆك بە "چەواشەكارانە و ناڕاست" وەسف دەكەن و دەڵێن "بە ڕوونی هەڕەشەی سزادانی ئەو ڕۆژنامەنووسەیان كردووە و دانیان پێدا نا كە ڕفاندوویانە".
ئاژانسی ڕۆژنیوز دەشڵێت "سەرلەبەری ئەو تۆمەت و چەواشەكارییانەی ئاسایشی پارتی لە دهۆك، ڕەت دەكەینەوە و ئیدانەی دەكەین. پارتی دەیەوێت ئەم كەیسەش هاوشێوەی كەیسی زیندانییانی تری بادینان بە لاڕێدا ببات".
سلێمان ئەحمەد، هاووڵاتیی ڕۆژئاوای كوردستانە و ماوەی پێنج ساڵە لە هەرێمی كوردستان دەژی و لەگەڵ ئاژانسی كاری كردووە.