پەرەگراف پرۆژە 17 خاڵییەكەی عوسمانی حاجی مەحموود بۆ 'هەستانەوە'ی گۆڕان بڵاو دەكاتەوە
پەرەگراف
عوسمانی حاجی مەحموود پرۆژەیەكی 17 خاڵی لەژێر ناوی "چەند بنەمایەك بۆ ساغكردنەوە و ڕێكخستنەوە و هەستانەوەی بزووتنەوەی گۆڕان" پێشكەشی گۆڕان دەكات و دەڵێت "گۆڕان بۆ هەستانەوە، لەم قۆناغەدا پێویستی بە ئیرادە و بڕیاری ئازاربەخش هەیە و پرۆژەی ڕوون و جیددی و كرداری هەیە".
"ساغكردنەوەی ناسنامە و ڕاستكردنەوەی گوتاری سیاسیی بزووتنەوەكە، یەكلاییكردنەوە و ڕێكخستنەوەی پەیوەندیی گۆڕان و كۆمپانیای وشە، كشانەوەی گۆڕان لە حكومەت، ڕۆڵی كوڕانی نەوشیروان مستەفا لە بزووتەوەكەدا بەپێی ڕێكارە حیزبییەكان، لێپرسینەوە لەوانەی كە لە گەندەڵی تێوەگلاون، ڕۆڵبینینی گۆڕان وەكوو ئۆپۆزسیۆنێكی بوێر و چالاك"، ئەمانە لە گرنگرترین خاڵەكانی پرۆژەكەی عوسمانی حاجی مەحموودن.
عوسمانی حاجی مەحموود كە یەكێكە لە سەركردە دیار و كاریگەرەكانی پێشووی بزووتنەوەی گۆڕان، لە سەرەتای پرۆژەكەیدا دەڵێت "بارودۆخی ڕێكخراوەیی و سیاسیی بزووتنەوەی گۆڕان لە دۆخێكی خراپ و مەترسیداردایە، متمانە و ئومێدی خەڵك بە بزووتنەوەكە گەیشتووەتە قۆناغ و ئاستێك كە چیتر هیچ ئومێدێكی بەردەوامیی لەسەر هەڵناچنێت".
هەروەها دەڵێت "گۆڕان بۆ هەستانەوە، لەم قۆناغەدا پێویستی بە ئیرادە و بڕیاری ئازاربەخش هەیە و پرۆژەی ڕوون و جیددی و كرداری هەیە".
ئەو سەركردەی پێشووی گۆڕان جەخت دەكاتەوە كە "هەوڵ و گۆڕانكاریی ڕووكەش، بزووتنەوەكە لەو دۆخەی ئێستا ڕزگار ناكات، بە پێچەوانەوە دەبێتە هۆكاری داڕمان و پەككەوتنی زیاتری".
پووختەی 17 خاڵەكەی پرۆژەكەی عوسمانی حاجی مەحموود:
1- ساغكردنەوەی ناسنامە و ڕاستكردنەوەی گوتاری سیاسی و ئاراستە و دید و هەڵوێستی بزووتنەوەكە، بە لەبەرچاوگرتنی دۆخی نوێ و بەپێی چەند هەنگاوێكی كرداری.
2- یەكلاییكردنەوە و ڕێكخستنەوەی پەیوەندیی نێوان گۆڕان و كۆمپانیای وشە (دارایی، موڵك و میدیا).
3- كوڕانی كاك نەوشیروان كە دەیانەوێت ڕۆڵی سیاسییان هەبێت، ئەوا پێویستە بەپێی ڕێكارە حیزبی و ڕێكخراوەییەكان بێت. ڕێگە نەدرێت كۆمپانیای وشە و پایەی خێزانی و دارایی بەكار بهێنن و لە دەرەوەی ئۆرگانەكانی بزووتنەوەكە خاوەن بڕیار و بڕیاربەدەست بن، بڕیاری بزووتنەوەكە بە تەواوەتی بۆ ئۆرگانەكانی بزووتنەوەكە بگەڕێتەوە.
4- كشانەوەی گۆڕان لە هەموو دەزگاكانی حكومەتی هەرێمی كوردستان و شار و ئیدارە سەربەخۆ و قەزا و ناحیەكان.
5- پێویستە گۆڕان ڕۆڵی ئۆپۆزسیۆنێكی بوێر و چالاك دوور لە گیانی پۆپۆلیستی و بانگەشەی قەبەی ناوەڕۆك بەتاڵ ببینێت.
6- لەدوای هەڵبژاردنی خولی شەشەمی پەرلەمانی كوردستان، بەشداریی كابینەی دەیەمی حكومەت نەكات.
7- تواناكانی ئێستای بزووتنەوەكە سەرلەنوێ بە فۆرم و ناوەڕۆكێكی گونجاو ڕێك بخرێنەوە.
8- پێداچوونەوە بە هەیكەل و دەستووری بزووتنەوەكە و فۆرمی كاركردنی.
9- بەشێك لەوانەی ئێستا خاوەن بڕیار و دەسەڵاتن لە بزووتنەوەكە، هەنگاوێك بكشێنەوە، بەشێك بن لە گۆڕان و پشتیوانی بن لە دەرەوەی هەیكەلی بڕیاردان.
10- لێپرسینەوە لەو كەسانە بكرێت كە لە گەندەڵی تێوەگلاون.
11- سەرچاوەی دارایی گونجاو پەیدا بكرێت و هەیكەلی حیزبی و كار و چالاكییەكانی گۆڕان بگونجێندرێت.
12- هاوكاری و یارمەتی لە هیچ هێزێكی سیاسی وەرنەگیرێت، سەرچاوەی دارایی گۆڕان ڕوون و شەفاف بێت.
13- ڕێكخستنەوە و پتەوكردنی پەیوەندی لەگەڵ هێزە سیاسییەكانی كوردستان و عێراق.
14- پێداچوونەوەیەكی ڕیشەیی و هەمەلایەن بە هاوپەیمانێتییەكان بكرێت، بە لەبەرچاوگرتنی ئەزموونەكانی هاوپەیمانی لە ڕابردوو لەگەڵ پارتی و یەكێتی.
15- چاوخشاندنەوەیەكی جددی و قووڵ بە شێواز و میتۆدی ئیدارەدانی پەیوەندییە دیبلۆماسییەكانی گۆڕان بكرێت.
16- پێویستە ڕاوێژ بە كەسانی پسپۆڕ بكرێت بۆ ڕێكخستنەوە و بەگەڕخستنەوەی توانا میدیاییەكانی گۆڕان.
17- خشتەیەكی دیاریكراو و كاتی پێویست بۆ جێبەجێكردنی هەموو خاڵەكانی سەرەوە دابنرێت.