پەرەگراف
گفتوگۆو کۆبوونەوەی چەند مانگێکی عوسمانی حاجی مەحمود و هاوڕێکانی لەگەڵ بزووتنەوەی گۆڕان بە شکستی یەکجاریی کۆتایی هات، گۆڕان ئامادە نییە هیچکام لەو داوا سەرەکییانە جێبەجێ بکات کە ناڕازییەکان پێیانوایە ئەوانە هەنگاوەکانی هەستانەوەی بزووتنەوەکەن.
ئەو کێشانەی بەرۆکی گۆڕانیان گرتووەو لە دوای مەرگی نەوشیروان مستەفاوە بوون بەهۆی جیابوونەوەی چەندین کەسایەتی و گروپ لە بزووتنەوەکە، هێشتا وەک خۆیانن، هەرچەندە گۆڕان چەندینجار بانگەوازی بۆ ئاشتەوایی ناوخۆیی و کاری پێکەوەیی بۆ هەستانەوە کردووە، بەڵام بانگەوازەکان بێکاریگەرو کێشەکان بێچارەسەر ماونەتەوە.
دواین هەوڵی چڕ بۆ گەڕانەوەی ناڕازییەکان سەرەتای ئەمساڵ دەستی پێکرد، بۆ ئەو مەبەستە عوسمانی حاجی مەحمود و هاوڕێکانی کە لە دیارترین ئەو کەس و گروپانەن کە وازیان لە بزووتنەوەکە هێناوە، پڕۆژەیەکی ١٧ خاڵییان ئاڕاستەی بەرپرسانی گۆڕان و کوڕانی نەوشیروان مستەفا کرد.
سەرچاوەیەکی باڵا کە بە وردیی ئاگاداری گفتوگۆکانە بە پەرەگرافی وت "ئەو پرۆژەیەش وەک سەرجەم هەوڵەکانی دیکە بۆ ئاشتەوایی ناوخۆیی و گەڕانەوەی ناڕازییەکان شکستی هێناو گفتوگۆکان بە یەکجاریی کۆتاییان هات".
لەبارەی هۆکاری شکستهێنانی، ئەو سەرچاوەیە وتی "دوو پرسی سەرەکی هەن کە گۆڕان ئامادە نییە هیچ هەنگاوێکیان لەبارەوە بنێت و یەکلاییان بکاتەوە، یەکەمیان پەیوەندیی بە کوڕەکانی کاک نەوشیروانەوە هەیە هەر لە ڕۆڵ و پێگەی سیاسی و خاوەن بڕیارییان لەناو گۆڕان و پەیوەندی ماڵیی و داراییان لەگەڵ بزووتنەوەکە بەتایبەت خاوەنداریی گردی زەرگەتەو کۆمپانیای وشە، دووەمیان پەیوەندیی بە هەڵوێستی سیاسی گۆڕانەوە هەیە بە کشانەوەی لە حکومەت و بوونەوە بە ئۆپۆزسیۆنێکی جددی و کاریگەر".
سەرچاوەکەی پەرەگراف دەڵێت "دوای ئەوەی گۆڕان وەڵامی ئەرێنیی هیچ داوایەکی سەرەکیی ناڕازییەکانی نەدایەوە، بە پەیوەندییەکی تەلەفۆنیی نێوان عوسمانی حاجی مەحمود و عومەری سەید عەلی بە یەکجاریی کۆتایی بەو دواین هەوڵەی گەڕانەوەی ناڕازییەکان هات".
بەپێی ئەو پڕۆژە ١٧ خاڵییەی عوسمانی حاجی مەحمودو هاوڕێکانی کە دەست پەرەگراف کەوتووە، گۆڕان لەم قۆناغەدا پێویستی بە ئیرادە و بڕیاری ئازاربەخش و پرۆژەی ڕوون و جیددی و كرداری هەیە، هەر بۆیە پڕۆژەکە لەژێر ناوی "چەند بنەمایەك بۆ ساغكردنەوە و ڕێكخستنەوە و هەستانەوەی بزووتنەوەی گۆڕان" پێشكەشی بزووتنەوەکە کراوە.
گرنگرترین خاڵەكانی پڕۆژەکە بریتین لە؛ ساغكردنەوەی ناسنامە و ڕاستكردنەوەی گوتاری سیاسی و پێداچوونەوەی ناوخۆیی، یەكلاییكردنەوەو ڕێكخستنەوەی پەیوەندیی گۆڕان و كۆمپانیای وشە لە ڕووی دارایی و موڵک و میدیا، كشانەوەی گۆڕان لە حكومەت و ڕۆڵبینینی وەكو ئۆپۆزسیۆنێكی بوێر و چالاك و لێپرسینەوە لەوانەی لە گەندەڵییەوە گلاون، هەروەها كوڕانی نەوشیروان مستەفا بەپێی ڕێكارە حیزبی و ڕێكخراوەییەكان ڕۆڵی سیاسییان هەبێت و ڕێگە نەدرێت كۆمپانیای وشە و پایەی خێزانی و دارایی بەكار بهێنن و لە دەرەوەی ئۆرگانەكانی بزووتنەوەكە خاوەن بڕیار و بڕیاربەدەست بن و بڕیاری بزووتنەوەكە بە تەواوەتی بۆ ئۆرگانەكانی بزووتنەوەكە بگەڕێتەوە.
ئامانجی ئەو پڕۆژەیەو هەوڵەکانی گۆڕان بۆ گەڕانەوەی ناڕازییەکان و پێکەوە کارکردن، هەستانەوەی بزووتنەوەکەیە لەو شکستە گەورەیەی تووشی بوو لە دواین هەڵبژاردنی پەرلەمانی عێراق لە ١٠ی ئۆکتۆبەری ٢٠٢١ کاتێک لە سەدا سەدی هەر 5 كورسییەكەی پەرلەمانی عێراقی لە دەستداو بە هەر حەوت كاندیدەكەی كە لە هەولێرو سلێمانی‌و كەركوك هەیبوو، تەنها 18 هەزارو 358 دەنگیان بەدەست هێناو هیچیان دەرنەچوون.
دوای دەرچوونی ئەنجامی بەرایی ئەو هەڵبژاردنە، گۆڕان دانی بە شكستەكەیدا نا، داوای لێبوردنی لە جەماوەر كرد و بەڵێنیدا گۆڕانكاریی ڕیشەیی ئەنجام بدات، وەك هەنگاوی یەكەمی ئەو گۆڕانكارییە، 72 كاتژمێر دوای هەڵبژاردن خانەی ڕاپەڕاندنی گۆڕان كە باڵاترین دامەزراوەی جێبەجێكردنی بڕیارە لە بزووتنەوەكەو لە ڕێكخەری گشتی‌و 6 ئەندامی دیكە پێكدێت، دەستلەكاركێشانەوەی بەكۆمەڵی ڕاگەیاند، بەڵام بزووتنەوەکە نەیتوانی شوێنەکانیان پڕبکاتەوەو ئەوان بەردەوامن لە پۆستەکانیان.
ناڕازییەکان و ئەوانەی لە گۆڕان دابڕاون پێیانوایە دەنگدەرو جەماوەری گۆڕان لەسەر هەڵوێستی خۆیان ماون، بەڵام نیگەران و توڕەو نائومێدن و ئەگەر بزووتنەوەکە بە کردار بیسەلمێنێت داکۆکیکاری مافەکانی خەڵکە، متمانەی جەماوەری بۆ دەگەڕێتەوەو هەوڵ و گۆڕانكاریی ڕووكەش، بزووتنەوەكە لەو دۆخەی ئێستا ڕزگار ناكات و بە پێچەوانەوە دەبێتە هۆكاری داڕمان و پەككەوتنی زیاتری.