مەسروور بارزانی هۆشداری دەدات لە 'كۆنترۆڵكردنی دامەزراوەكانی حكومەتی عێراق لەلایەن یەك گرووپەوە'

پەرەگراف

مەسروور بارزانی دەڵێت "ئەگەر بڕیارە تاكلایەنەكان لە عێراق بەردەوام بن و دامەزراوەكانی حكومەت لەلایەن یەك گرووپەوە كۆنترۆڵ بكرێن، هەستی نادادپەروەری قووڵتر دەبێتەوە. بەرهەمی ئەم فاكتەرانەش: گەندەڵی و نادادپەروەری و هەژراییە و ئەمانەش هۆكارن بۆ ئەوەی ناسەقامگیری دروست ببێت و توندڕەویش لەم هەلومەرجانەدا سەرهەڵدەداتەوە".

ئەمڕۆ كۆڕبەندی ئاشتی و ئاسایشی ڕۆژهەڵاتی ناوەڕاست ناسراو بە (MEPS)ی زانكۆی ئەمەریكی كوردستان لە دهۆك دەستی پێ‌ كرد و مەسروور بارزانی، سەرۆكی دەستەی ئەمیندارانی زانكۆی ئەمەریكی كوردستان و سەرۆكی حكومەتی هەرێمی كوردستان، وتاری بەخێرهاتنی پێشكەش كرد.

مەسروور بارزانی لە وتارەكەیدا وتیشی "پەرەسەندنەكانی ئەم دواییەی عێراق جێگەی نیگەرانین. بەردەوامی پێشێلكردنی دەستووری عێراق و پابەندنەبوون بەو ڕێككەوتنەی پێكهێنانی ئەم حكومەتەی ئێستای لێ كەوتەوە، مەترسیی ناسەقامگیری و دووبارە سەرهەڵدانەوەی تایفەگەری و دابەشبوون لەنێوان پێكهاتە سەرەكییەكان لێ دەكەوێتەوە".

مەسروور بارزانی جەختیشی كردەوە كە "شێوازێكی گشتگیر و هەمەلایەنە بۆ بەرێوەبردنی عێراق و جێبەجێكردنی كارە تەواو نەكراوەكانی ناوچەكە، پێویستییەكی بەپەلەیە".

دەقی وتاری مەسروور بارزانی:

بەڕێز سەرۆكی هەرێمی كوردستان نێچیرڤان بارزانی

سەركردە بەرێزەكان، شارەزایان، میوانانی هێژا،

ئامادەبووانی خۆشەویست،

بەیانیتان باش.

بەخێرهاتنێكی گەرمتان دەكەم بۆ چوارەمین كۆڕبەندی ئاسایش و ئاشتی رۆژهەڵاتی ناوەراست كە لەلایەن زانكۆی ئەمەریكی لە كوردستان ڕێكخراوە.

جارێكی دیكە، لەگەڵ كۆمەڵێك شارەزای ناوازە، بازرگان و بڕیاربەدەست كۆبووینەتەوە، كە هەموویان شارەزایی و تێگەیشتنێكی قووڵیان بۆ ناوچەكەمان و پابەندییە هاوبەشەكانمان و ئەو كێشانەی هەن هەیە. ئەو تاقیكردنەوانەی ڕووبەروویان دەبینەوە وەك خەڵك و نەتەوە، تاقیكردنەوەی گەورەن. هەریەك لە ئێوە كە ئەمرۆ لێرەن، ساڵی ڕابردوو بەشێوەیەك لە شێوەكان ڕووبەرووی ئەو كێشانە بوونەتەوە كە لە چەند ڕۆژی داهاتوو باسیان لێوەدەكەین. من دڵنیام، بە هەمانشێوەی من، ئێوەش لەوكاتانەدا خۆزگەتان خواستووە، وەڵامەكان ئاسانتر بوونایە لەوەی كە هەن.

ئەو ئەجێندایەی لەلایەن ڕێكخەرانی كۆنفرانسەكە دانراوە، بریتین لەو كێشانەی ڕۆژانە ڕووبەرووی هەموومان دەبنەوە. بابەتەكانی وەك گۆڕانی كەشوهەوا، كۆچی بەكۆمەڵ، توندڕەویی و پاڵنەرەكانی و درێژە پێدان وبەردەوامیی سەرچاوە سرووشتییەكان و سیستمەكانی بەرێوەبردن، هەموو ئەمانە گفتوگۆیان لەسەر دەكرێت. پێشبینی ئەوەش دەكەم هەندێك لەو گفتوگۆیانەی دەكرێن زانیاری و بەرچاوڕوونیان تێدا بێت لەبارەی بڕیاردان و بژاردە سیاسیەكان. لەبەرئەو هۆكارانە، كۆبوونەوەیەكی لەمجۆرە و ئەو گفتوگۆیانەشی تێدا دەكرێن لەلایەن ڕۆشنبیر و شارەزایان، دەتوانن هاوكاربن بۆئەوەی دەرئەنجامێكی باشیان هەبێت.

خۆشحاڵم كە بەشداران لە چەند وڵاتێكی جیاوازەوە هاتوون. ئەو هاوڕێیانەی لە وڵاتانی دراوسێ و دوورەوە هاتوون، بەخێرهاتنتان دەكەم و پەرۆشم بۆ قووڵكردنەوەی پەیوەندییەكانمان. بەشداریتان پابەندبووتان دەسەلمێنێت بە دیالۆگ، وەك پاڵنەرێك بۆ تێگەیشتن. جیا لەسەر ئاستی ناوخۆیی، یان جیهانی بێت، هیچ جێگرەوەیەك بۆ گفتوگۆ و دانیشتن لەسەر مێز نیە، بۆ دۆزینەوەی چارەسەر بۆ ئاڵنگارییەكان. پێویستە لە كۆبوونەوە و گفتوگۆكانمان بەردەوام بین.

هاوڕێیان:

دەبێ ئامادەبین بۆ تێگەیشتن و داننان بەوەی، هەندێك لەو كێشانەی لێرە گفتۆگۆیان لەبارەوە دەكرێت مەترسین بۆسەر هەموومان. بەرزبوونەوەی خێرای پلەی گەرمای هەسارەی زەوی، لێكەوتەی زۆر مەترسیداری دەبن لەسەر ناوچەكەمان و جیهانیش، نەبوونی ئاسایشی خۆراك و كەمئاوی و كۆچی بەكۆمەڵ خێراتر دەكات. ئەمەش كێشەیەك نیە دوای بخەین. چونكە ئێستا وا ڕوودەدات. شەپۆلەكانی گەرما و لافاوەكان زیاتر بوون، ئێستا ناچاربووین بیری قووڵتر لێ بدەین بۆئەوەی بگەینە ئاو. بەگوێرەی تازەترین ئاماژەكان، پێشبینیەكانی بەرزبوونەوەی پلەكانی گەرما لە ڕۆژهەڵاتی ناوەراست زۆر نزیكن لەوەی بەڕاستی ڕووبدەن. پێویستە كاری باشتر بكەین بۆ ڕێگریكردن لە دەردانی كاربۆن. هەموو هۆكارێكیشمان هەیە بۆئەوەی ئەو كارە بكەین و هیچ هۆكارێك نیە بۆئەوەی نەیكەین.

ئێستا كاتی ئەوە نیە خۆمان لە بەرپرسیارێتی بدزینەوە یان دەستەوەستان بین و خۆمان لە كێشەكان بەدوور بگرین. پێویستە لەپێناو بەرژەوەندی گشتی كار بكەین، پێش هەموو شتێك وەك هاووڵاتی، بەڵام بە ڕەهەندێكی جیهانی. لە مامەڵەكردن لەگەڵ ئەو ئاڵنگارییانەی ڕووبەرووی هەموومان دەبنەوە، خۆبەستنەوە بەو هەستەی، لەكوێ دەژین، دەرئەنجامی خراپی دەبێت لەسەرمان. كوردستان ناتوانێت بۆ نموونە لە دەرئەنجامەكانی گەرمبوونی كوەیت هەڵبێت. بەحرەین و بەسڕە، نەك تەنیا لەڕێگەی دەریاوە بەڵكوو، بە چارەنووسێكی هاوبەشی كەشوهەواشەوە پێكەوە بەستراونەتەوە.

بەهای هاوبەشی مرۆییمان داوامان لێدەكات، ڕووبەرووی گەرمبوونی هەسارەی زەوی ببینەوە، بەهەمان شێوەی دیمەنەكانی شەڕ و بێكاری دەیان ساڵی رابردوو ، ئێستاش بەردەوام دەیانبینین. بۆیە ناكرێت ڕێگە بدەین دیمەنێكی لەوشێوەیە ببێتە شتێكی ئاسایی.

هەموومان دیمەنی دڵتەزێنی خەڵكی سیڤل و بێتاوانمان بینیوە، منداڵ و بە تەمەن بوونەتە قوربانی شەڕێكی دیكەی وێرانكەر. پێویستە ئەم دیمەنانە بەئاگامان بێنێتەوە. ئەو توندوتیژییانەی ئێمە دەیانبینین، هیچكات چارەسەر نین و ئاشتی بەدیناهێنن، بەڵكو دەبنە هۆی بەردەوامی وێرانكاری و كارەساتەكان.

پێویستە ئێمە نەك تەنیا سەركۆنەی شەڕ و توندوتیژییەكان بكەین، بەڵكو دەبێ چارەسەر بۆ كێشە هەڵواسراوەكان و ناكۆكییەكانیش، پێش ئەوەی بگاتە ڕووبەرووبوونەوەی سەربازی، بدۆزینەوە. نابێت بۆ چارەسەری كێشەكان چاوەڕێ بكەین، لەكاتێكدا دەتوانین پێش ئەوەی لە كۆنترۆڵ دەربچن چارەسەریان بكەین. پێویستە جیاوازییەكانی یەكتر قبوڵ بكەین و فێربین بەرێزەوە لەگەڵ یەكتر بژین، نەوەكو بەدوای پاساودا بگەڕێین بۆ ڕەتكردنەوەی بەرامبەر.

هەموومان لە دەستپێكردنەوەی توندوتیژییەكانی ڕۆژهەڵاتی ناوەراست شۆك بووین. چارەسەرنەكردنی ناكۆكییەكی دەیان ساڵە و لە قاڵبدانیشی بەهەمان شێوە كێشەیە. بۆ نموونە، 30 ساڵە چارەسەریی دوو دەوڵەت بۆ فەلەستین و ئیسرائیلیەكان وەك پێویستی و مۆدێلێك دەبینرێت. كوردیش بەهەمان شێوە داوای هەمان ماف و شكۆمەندییان كرد، بەڵام هێشتا دۆزی ئێمە پشتگوێ خراوە. چۆن پشتگیرییەكی زۆر لە دۆزی كەسێك دەكەیت و لەبەرامبەر دۆزی ئەوانی دیكەدا، خۆت بێدەنگ دەكەیت؟ ئێستا كاتی ئەوەیە كاری باشتر بكەین. كێشە چارەسەر نەكراوەكان پێویستیان بە وەڵامی بوێرانەیە. ئێستا كە جیهان بەدوای چارەسەرێكی هەمیشەییدا دەگەڕێت بۆ دۆزی فەلەستین، منیش داوای ڕێگەیەكی نوێ دەكەم، بۆئەوەی بزانین ئێمەی كوردستانی، چۆن بتوانین لەگەڵ دراوسێكانمان بەیەكەوە بژین.

پەرەسەندنەكانی ئەم دواییەی عێراقیش جێگەی نیگەرانین. بەردەوامی پێشێلكردنی دەستووری عێراق، و پابەندنەبوون بەو ڕێككەوتنەی پێكهێنانی ئەم حكومەتەی ئێستای لێكەوتەوە، مەترسی ناسەقامگیری و دووبارە سەرهەڵدانەوەی تایفەگەری و دابەشبوون لەنێوان پێكهاتە سەرەكییەكان لێ دەكەوێتەوە.

ئەگەر بڕیارە تاكلایەنەكان بەردەوامبن و دامەزراوەكانی حكومەت لەلایەن یەك گرووپەوە كۆنترۆڵ بكرێن، هەستی نادادپەروەری قووڵتر دەبێتەوە. بەرهەمی ئەم فاكتەرانەش: گەندەڵی و نادادپەروەری و هەژراییە و ئەمانەش هۆكارن بۆ ئەوەی ناسەقامگیری دروست ببێت و توندڕەویش لەم هەلومەرجانەدا سەرهەڵدەداتەوە.

شێوازێكی گشتگیر و هەمەلایەنە بۆ بەرێوەبردنی عێراق و جێبەجێكردنی كارە تەواو نەكراوەكانی ناوچەكە، پێوێستیەكی بەپەلەیە.

هاوڕێیان،

ئێستا كە ئێوە لێرەن، داواتان لێدەكەم، پێشوازی لەو شتانە بكەن كە ئێمە وەك كوردستانی پێشكەشی دەكەین. لە ڕێگەی ئێوەشەوە، داوا لە هەموو جیهان دەكەم ئەو هەنگاوانە ببینن كە ئێمە لە ڕووی ئابووری و پێكەوەژیانی ئاشتیانەی پێكهاتەكانەوە ناومانن. زۆر زیاترمان هەیە بۆئەوەی بە جیهانی نیشان بدەین، بانگهێشتان دەكەم بۆ ئەوەی لەم هەنگاوانەدا لەگەڵمان بەشدار بن.

لەگەڵ دەستپێكردنی ئەم كۆڕبەندە، داواتان لێدەكەم لەم هۆڵەدا پێكەوە گفتوگۆیەكی ژیرانە بكەن. بەو هیوایەی گفتوگۆكانمان ببنە هاندەر بۆ بیرۆكەی نوێ و چارەسەری كرداری.

جارێكی دیكە، لەدڵەوە بەخێرهاتنێكی گەرمی یەك بە یەكتان دەكەم بۆ كۆڕبەندی ئاشتی و ئاسایشی ڕۆژهەڵاتی ناوەراست.

سوپاستان دەكەم