پەرەگرف
كۆمپانیایەكی دیكەی بواری نەوت ئامادەكاری كردووە بۆ جێهێشتنی كێڵگە نەوتییەكانی هەرێمی كوردستان و فرۆشتنی پشكەكانی.
كۆمپانیای ئەبوزەبیی نیشتمانی بۆ وزە، كە كۆمپانیایەكی ئیماراتییە و خاوەنی 47.4%ـی پشكەكانی كێڵگەی نەوتی (ئەتروش)ـە، دوای 10 ساڵ كاركردن لە هەرێمی كوردستان، پشكەكانی دەفرۆشێت و دەكشێتەوە.
ئەمڕۆ 22-1-2024، كۆمپانیاكە ڕایگەیاند، ڕێككەوتنی كۆتایی لەگەڵ كۆمپانیای جەنەراڵ ئیكسپلۆرەیشن واژوو كردووە، بۆ فرۆشتنی تەواوی پشكەكانی لە كێڵگەی نەوتی ئەترووش.
كۆمپانیای ئەبوزەبیی نیشتمانی بۆ وزە ساڵی 2013 هاتووەتە هەرێم و سەرەتا 53.2%ـی پشكەكانی ئەو كێڵگە نەوتییەی بە بەهای 600 ملیۆن دۆلار لە كۆمپانیای ئیكسپلۆرەیشن بارتنرز كڕیوە.
ئێستا پشكەكانی كێڵگەی نەوتی ئەترووش 47.4%ـی لەلایەن كۆمپانیا ئیمارتییەكە و 27.6%ـی لەلایەن كۆمپانیای ئیكسپلۆرەیشن 25%ـی لەلایەن حكومەتی هەرێمی كوردستانەوە خاوەندارێتی دەكرێت.
كێڵگەی نەوتی ئەترووش دەكەوێتە نزیكی شاری هەولێر، لە كۆتایی ساڵی 2019دا بەرهەمی ڕۆژانەی نزیكەی 50 هەزار بەرمیل نەوت بووە.
لە دوای ڕاگرتنی هەناردەی نەوتی هەرێمی كوردستان لە 25-3-2-23 بەهۆی بڕیارەكەی دادگای ناوبژیوانیی پاریس، ژمارەیەك لە كۆمپانیاكانی نەوت لە هەرێمی كوردستان كۆتاییان بە كار و گرێبەستەكانیان هێنا.