ئەنجوومەنی سەرتاسەریی مامۆستایان و فەرمانبەرانی ناڕازی وەڵامێكی توندی یەكێتی دەداتەوە
پەرەگراف
ئەنجوومەنی سەرتاسەریی مامۆستایان و فەرمانبەرانی ناڕازی وەڵامێكی توندی یەكێتی دەداتەوە و شكاندنی بایكۆت ڕەت دەكاتەوە. ئەنجوومەنەكە دەڵێت "كەسی دووەمی یەكێتی، جێگری سەرۆكی حكومەتی كوردستانە و بە فیعلییش سەرۆكی حكومەتی ئیدارەی زۆنەكەیانە، ئەو بەڕێزە لە پێنج مانگی ڕابردوودا جگە لە كۆمەڵێك لێدوان، هیچ هەنگاوێكی بۆ سەرپێخستنەوەی خوێندن نەناوە".
ئەنجوومەنەكە لە ڕاگەیەندراوێكدا یەكێتی تۆمەتبار دەكات بەوەكە كە پێنج مانگە بایكۆتی بۆ دوو مەبەست بەكارهێناوە، كە بریتین لە "تەواوبوونی هەڵبژاردنی پارێزگاكانی عێراق و فشار بۆ دانوستان لەگەڵ پارتی"، دەشڵێت "ئێستا كە كاتی پێكهێنانی حكومەتی خۆجێیی پارێزگای كەركووكە و پێویستی بە دەنگی پارتییە، دەیەوێت بە چاوسووركردنەوە و نانبڕینی نایاسایی و كۆمەڵێك دەسەواژەی چەواشەكارانە، پرسەكە بێنێتەوە گۆڕێ".
دەقی ڕاگەیەندراوی ئەنجوومەنی سەرتاسەریی مامۆستایان و فەرمانبەرانی ناڕازی:
وەڵامێك بۆ بەلاغی كۆتایی كۆبوونەوەی ئەنجوومەنی سەركردایەتیی یەكێتیی نیشتیمانیی كوردستان لە رۆژی 22-1-2024
یەكێتیی نیشتیمانیی كوردستان كە دەسەڵاتدار و قەڵەمڕەوی زۆنێكی گەورە و كاریگەرە، پاش زیاتر لە چوار مانگ و نیو لە بایكۆتی مامۆستایان و فەوتانی وەرزێكی تەواوی خوێندن و لەسەرەمەرگی وەرزی دووەمدا و لە پەراوێز و كۆتا خاڵی كۆبوونەوەكەیاندا، زۆر بە لاستیكیی و ئینشائییانە و بەبێ هیچ چارەسەرێك و بەدەستەواژەی پڕ لە شەرمەزاریی(بایكۆت تەنیا لەم دەڤەرە هیچ ئەنجامێكی لێ بەدینەهاتووە) داوا لە مامۆستایان ئەكەن كە بایكۆت بشكێنن!
كۆبوونەوە و داواكارییەكانی ناو كۆبوونەوەكە لە كاتێكدایە كە كەسی دووەمی ئەو حیزبە جێگری سەرۆكی حكومەتی كوردستانە و بە فیعلییش سەرۆكی حكومەتی ئیدارەی زۆنەكەیانە، ئەو بەڕێزە لە پێنج مانگی ڕابردوودا جگە لە كۆمەڵێك لێدوان، هیچ هەنگاوێكی بۆ سەرپێخستنەوەی خوێندن نەناوە لە قەڵەمڕەوییەكەیاندا، كە لایەنی كەم ئەیتوانی بە جێبەجێكردنی چەند خاڵێك لە پێنج خاڵی داواكاریی مامۆستایان و فەرمانبەران و وانەبێژان، مامۆستایانیان دڵخۆش بكردایە و ئومێدێكی بۆ شكاندنی بایكۆت دروست كردبا !
یەكێتیی ئەتوانێت خەڵكیتر چەواشە بكات، بەڵام مامۆستایان كە وانەی (هۆشیاریی) بە كۆمەڵگا ئەڵێنەوە، بەرچاویان ڕوونە كە یەكێتیی خۆی بەشێكە لە كێشەكان و هەر بۆ خۆیشیان ئەتوانن بەشێك بن لە چارەسەر.
یەكێتیی دەسەڵاتی ڕەهای هەیە لە زۆنەكەدا و لە كۆی هەرێمیش وەك پارتیی بەرپرسیارە و ناتوانێت خەڵك بەلاڕێدا ببات و وەك ئۆپۆزسیۆن لەلایەك موخاتەبەمان بكات و لەلایەكیترەوە مەڵبەند و كۆمیتەكانی و بەڕێوەبەرەكانی پەروەردەمان بۆ بخاتەگەڕ تا ناچار بە دەوامكردنمان بكات!
لە بەلاغەكەدا ناوی سەرۆكی یەكێتیی(بافڵ تاڵەبانیی) هاتووە كە داكۆكیكار بووبێت لە مافەكانمان، ئەو بەڕێزە بە هەندێ جووڵە و لێدوان، بڕوایەكی لای خەڵك دروستكرد كە ببێت بە سەرەتایەكی ئەوتۆ كە ئومێد بگێڕێتەوە بۆ كۆمەڵگاكەمان، بەڵام دیسان ئەویش جگە لە دیاردەیەكی میدیایی، چی دیكەی لێ شین نەبوو !
ئێمە لەوان ئەپرسین؛ باس لە هەوڵەكانی سەرۆكی یەكێتیی دەكرێت لە بەغدا، ئایا هەوڵەكانی چیبوون و ئەنجامەكانی چی بوو؟!
بە پێچەوانەوە، ئێستا بڕوایەك لەناو خەڵكدا هەیە، كە یەكێتیی پێنج مانگە پرسی(بایكۆتی مامۆستایان)ی بۆ دوو مەبەست ڕاگرتووە و فشارێكی ئەوتۆی لە مامۆستایان ننەكردووە تا بایكۆت بشكێنن :
یەكەم: تا هەڵبژاردنی پارێزگاكانی عێراق تەواو ببێت و موزایەدەی بوونی ئازادی ڕادەربڕین لە قەڵەمڕەوییەكەیدا بەسەر لایەنیتردا بكات.
دووەم: وەك فشارێك و بۆ دانوستان لەگەڵ پارتیی لەسەر مێزەكە بیهێڵێتەوە، تا دەستكەوتی زیاتر بۆ خۆیان و سەركردەكانیان بەدەست بهێنن.
ئێستاش كە كاتی پێكهێنانی حكومەتی خۆجێیی پارێزگای كەركوكە و پێویستی بەدەنگی پارتییە، ئەیەوێت بە فشار و چاوسووركردنەوە و غیابدان و نانبڕینی نایاسایی و كۆمەڵێك دەسەواژەی چەواشەكارانە، پرسەكە بێنێتەوە گۆڕێ!
ئێمەش بە خەڵكی كوردستان ئەڵێین:
١- بە ڕاوێژ و پرسكردن بە هیچ كەس و لایەنێك بایكۆتمان نەكردووە، تا بە خواست و ویستی ئەویش بیشكێنین!
٢- بایكۆت پرسێكی سیاسیی نییە تا بە كۆبوونەوەی سیاسیی و سەركردایەتی هیچ حیزبێك بشكێت!
بۆ یەكێتییش وا باش بوو كە لەبری كۆبوونەوەی خۆی، فشاری لە (قوباد تاڵەبانیی) كردبا تا ببێتە فریادڕەسی (خوێندنی ئەم ساڵی خوێندكاری هەژار و نەداران) بەوەی كە ئەگەر (مەسرور بارزانی) و پارتی داواكاریی مامۆستایان و فەرمانبەران جێبەجێ نەكات، ئەوا لە كابینە وەزارییەكەی ئەكشێنەوە، نەك وەك ئۆپۆزسیۆن و تەنێكی نامۆ بە جەستەی حكومەت چەواشەكاری بكەن!
٣- داخوازییەكانمان ڕوونن، ئێستاش نەچووە و بچێت، ئەتوانن دڵی شكاوی مووچەخۆران بە دەست بێنن و لە هەمان كاتدا دڵی خوێندكاران و كەسوكاریشیان خۆش بكەن.
بایكۆت و ناڕەزایەتییەكان بەردەوام ئەبن و بەبێ ئەنجام كۆتایی نایەت..
دروود بۆ خۆڕاگریی مامۆستایان و وانەبێژان..
سەربەرزیی بۆ خەڵكی بەهەڵوێستی چین و توێژەكانی دیكە..
ئەنجومەنی سەرتاسەریی مامۆستایان و فەرمانبەرانی ناڕازیی
23-1-2024