پەرەگراف
مامۆستایانی ناڕازی لە ئیدارەی گەرمیان و كارمەندانی تەندروستی لە ئیدارەی ڕاپەڕین دژی دواكەوتنی مووچە گربوونەوەیان ئەنجام دا. لقی سلێمانیی كارمەندانی تەندروستیش هەڕەشەی بایكۆتی گشتی دەكات.
ئەمە لە كاتێكدایە كە 48 ڕۆژە مووچە دابەش نەكراو و چەند ڕۆژێكە بەرەی بایكۆت و ناڕازی لە فراوانبووندایە، فەرمانبەرانی چەندین فەرمانگە و دامودەزگای حكومەت چوونە پاڵ مامۆستایان و بایكۆتیان ڕاگەیاندووە.
لە بەردەم بەڕێوەبەرایەتیی پەروەردەی گەرمیان، مامۆستایانی ناڕازیی كەلار و كفری بۆ چەندەمین جار گردبوونەوەیان ئەنجام دا و جەختیان لە بەردەوامیی بایكۆت تا پێدانی مافەكانیان كردەوە.
یەكێك لە مامۆستایانی ناڕازیی گەرمیان دەڵێت "لە ساڵی 2014ـەوە حكومەتی هەرێم ستەم لە ئێمە دەكات و چەندین مووچەی خواردووین، پلەبەرزكردنەوەی ڕاگرتووە".
مامۆستایانی ناڕازیی گەرمیان ڕایانگەیاند تا داواكارییەكانیان كە پەیوەستە بە مووچەوە جێبەجێ نەكرێن، بایكۆت ناشكێنن.
لە بەردەم بەڕێوەبەرایەتیی تەندروستیی ڕاپەڕینیش كارمەندانی تەندروستیی دەڤەرەكە گربوونەوەیەكی فروانیان دژی دواكەوتنی مووچە ئەنجام دا.
كارمەندانی تەندروستیی ڕاپەڕین هەڕەشەی بایكۆتیان كرد ئەگەر بەزوویی مووچەیان پێ نەدرێت.
ئەمە لە كاتێكدایە كە دوێنێ لقی سلێمانیی سەندیكای تەندروستكارانی كوردستان هۆشداریی دا كە ئەگەر لەم چەند ڕۆژەدا مووچە دابەش نەكرێت، ئەوا لە سەرەتای هەفتەی داهاتووەوە بایكۆتی گشتی ڕادەگەیەنن.
سەندیكاكە دەڵێت "توانای بەرگەگرتنی ئەم قەیرانە قورسەمان نامێنێت و ناچار دەبین ئەم سێكتەرە گرنگ و هەستیارە جێبهێلین، بەرپرسیارێتیی هەر ڕووداوێكی نەخوارزراویش دەخەینە ئەستۆی حكومەتی هەرێم و وەزارەتی تەندروستی".
حكومەتی هەرێمی كوردستان سێ مووچەی كۆتای ساڵی ڕابردوو و مووچەی یەكەم مانگی ئەمساڵی فەرمانبەران قەرزارە. ئەمڕۆی كە كۆتا ڕۆژی مانگی یەكە، 48 ڕۆژ لەمەوبەر و لە 13-12-2023 دەست بە دابەشكردنی مووچەی مانگی نۆی 2023 كراوە.
بەهۆی دواكەوتنی مووچەوە، لە سلێمانی زۆرینەی فەرمانبەرانی ژمارەیەك فەرمانگە بایكۆتیان ڕاگەیاندووە، لەوانە: دادنووس، بەڕێوەبەرایەتیی كارەبا. لە چەمچەماڵیش فەرمانبەرانی زانكۆی چەرمۆ، هەروەها لە هەڵەبجە فەرمانبەرانی سەرۆكایەتیی زانكۆ، دادنووس، بەشی كوتان لە نەخۆشخانەی منداڵان و بەڕێوەبەرایەتیی ڕۆشنبیری بایكۆتیان كردووە.
وەزارەتی دارایی هەرێم بۆ دابەشكردنی مووچە چاوەڕوانی ئەو 618 ملیار دینارەیە كە لەلایەن ئەنجوومەنی وەزیرانی عێراقەوە بڕیاری ناردنی دراوە، بەڵام تا ئێستا وادەی ناردنی دیار نییە و وەزارەتی دارایی عێراق دەستی دەستیی پێ دەكات.